MORBI:મોરબીમાં દારૂડિયા વેપારીનો આતંક: નશામાં ધૂત થઈ વર્ના કાર દોડાવી બે સ્થળે અકસ્માત સર્જ્યા
MORBI:મોરબીમાં દારૂડિયા વેપારીનો આતંક: નશામાં ધૂત થઈ વર્ના કાર દોડાવી બે સ્થળે અકસ્માત સર્જ્યા
દારૂબંધીના લીરેલીરા ઉડાડતો વેપારી પોલીસના સિકંજામાં: વિવિધ કલમો હેઠળ ગુનો દાખલ
શનાળા રોડ પર બે અલગ-અલગ જગ્યાએ વાહનોને લીધા હડફેટે, લોકોમાં ભય અને રોષનો માહોલ
ગુજરાત રાજ્યમાં કડક દારૂબંધી અમલમાં હોવાના દાવાઓ વચ્ચે મોરબી શહેરમાંથી કાયદો અને વ્યવસ્થાના લીરેલીરા ઉડાવતો એક ચોંકાવનારો કિસ્સો સામે આવ્યો છે. શહેરમાં એક જાણીતા વેપારીએ દારૂના નશામાં ચૂર થઈને પોતાની વૈભવી કાર બેફામ હંકારી હતી અને શનાળા રોડ પર બે જુદા-જુદા સ્થળોએ અકસ્માત સર્જી ભારે આતંક મચાવ્યો હતો. આ ઘટનાને પગલે સ્થાનિક લોકોમાં ભય સાથે ભારે રોષની લાગણી ફેલાઈ ગઈ હતી. પોલીસે તાત્કાલિક એક્શનમાં આવી નશાખોર વેપારીની ધરપકડ કરી કાયદેસરની કાર્યવાહી હાથ ધરી છે.
મળતી વિગતો મુજબ, મોરબીના પોશ ગણાતા રવાપર રોડ પર સરદાર બાગ પાછળ આવેલી સોમનાથ સોસાયટીમાં રહેતા જંતીલાલ દેત્રોજા નામના વેપારી રાત્રિના સમયે દારૂના નશામાં ધૂત હતા. આ હાલતમાં જ તેઓ પોતાની ‘હ્યુન્ડાઈ વર્ના’ કાર લઈને રોડ પર નીકળ્યા હતા. નશાના કારણે સ્ટેયરીંગ પરથી કાબૂ ગુમાવતા વેપારીએ શનાળા રોડ વિસ્તારમાં બે અલગ-અલગ સ્થળોએ અકસ્માત સર્જ્યા હતા. બેફામ દોડતી કારે રસ્તા પર અન્ય કેટલાક વાહનોને જોરદાર હડફેટે લીધા હતા, જેના કારણે વાહનોને મોટું નુકસાન થયું હતું અને રસ્તા પરથી પસાર થતા રાહદારીઓમાં નાસભાગ મચી ગઈ હતી.
લોકોએ પોલીસને જાણ કરી, એ-ડિવિઝન ટીમ ત્રાટકી
અકસ્માત સર્જાતા જ સ્થાનિક લોકો ઘટનાસ્થળે એકઠા થઈ ગયા હતા અને સમગ્ર મામલાની જાણ મોરબી સિટી એ-ડિવિઝન પોલીસને કરવામાં આવી હતી. ઘટનાની ગંભીરતાને જોઈને પોલીસની ટીમ તાત્કાલિક ઘટનાસ્થળે દોડી ગઈ હતી અને તપાસ શરૂ કરી હતી. પોલીસ તપાસ દરમિયાન કારચાલક જંતીલાલ દેત્રોજા પુષ્કળ દારૂ પીધેલી હાલતમાં હોવાનું સામે આવ્યું હતું. પોલીસે સ્થળ પરથી જ તેની અટકાયત કરી લીધી હતી.
મોટર વ્હીકલ એક્ટ અને પ્રોહિબિશન હેઠળ ગુનો દાખલ
પોલીસે આરોપી વેપારી જંતીલાલ દેત્રોજાને કસ્ટડીમાં લઈ તેની તબીબી તપાસ (મેડિકલ ટેસ્ટ) કરાવી કાયદાકીય પ્રક્રિયા પૂર્ણ કરી હતી. મોરબી સિટી એ-ડિવિઝન પોલીસે આરોપી વિરુદ્ધ નીચે મુજબની કલમો હેઠળ ગુનો નોંધી વધુ તપાસ હાથ ધરી છે:
પ્રોહિબિશન એક્ટ કલમ: 66(1)(બી) (દારૂબંધી ભંગ અને નશાખોરી)મોટર વાહન અધિનિયમ (MV Act) કલમો: 185 (નશામાં વાહન ચલાવવું), 3 અને 181 (લાયસન્સ વિના અથવા નિયમોના ઉલ્લંઘન સાથે ડ્રાઇવિંગ)રાજ્યમાં દારૂબંધી હોવા છતાં આ પ્રકારે નશામાં વાહન ચલાવી લોકોના જીવ જોખમમાં મૂકનારા તત્વો સામે પોલીસ કડક પગલાં ભરે તેવી લોક માંગ ઉઠી રહી છે. હાલ પોલીસે વેપારીની કાર જપ્ત કરી આગળની તપાસના ચક્રો ગતિમાન કર્યા છે.
