MORBI:મોરબીમાં વ્યાજખોરોનો આતંક: મહિલા વ્યાજખોરના ત્રાસથી કુરિયર બોયનો આપઘાતનો પ્રયાસ
MORBI:મોરબીમાં વ્યાજખોરોનો આતંક: મહિલા વ્યાજખોરના ત્રાસથી કુરિયર બોયનો આપઘાતનો પ્રયાસ
મોરબી: શહેરમાં વ્યાજખોરોનો ગાળિયો વધુને વધુ મજબૂત બની રહ્યો હોય તેમ લાગી રહ્યું છે. વ્યાજખોરોના ત્રાસનો વધુ એક કિસ્સો પ્રકાશમાં આવ્યો છે, જેમાં એક કુરિયર બોય તરીકે કામ કરતા યુવકે મહિલા વ્યાજખોરની ધમકીઓથી કંટાળી ફિનાઈલ પીને જીવન ટૂંકાવવાનો પ્રયાસ કર્યો હતો.
મોરબીના નાની વાવડી રોડ પર આવેલી ધર્મનગર સોસાયટીમાં રહેતા વિવેકભાઈ પ્રકાશભાઈ માવાણી (ઉ.વ. ૨૭) નામના યુવકે આ અંગે પોલીસ ફરિયાદ નોંધાવી છે. વિવેકભાઈ કુરિયર બોય તરીકે કામ કરી પોતાના પરિવારનું ગુજરાન ચલાવે છે.ગઈકાલે તેમણે આરોપી જયાબેન ખિમજીભાઈ મોરડીયા (રહે. નજરબાગ મફતીયાપરા, ભડીયાદ) વિરુદ્ધ મોરબી સીટી એ ડિવિઝન પોલીસ સ્ટેશનમાં ગુન્હો દાખલ કરાવ્યો છે.ફરિયાદમાં જણાવ્યા અનુસાર, વિવેકભાઈએ જયાબેન પાસેથી ₹50,000 વ્યાજે લીધા હતા. જેની સામે તેમણે:વખતોવખત રોકડેથી કુલ ₹40,000 વ્યાજ પેટે ચૂકવી દીધા હતા.મૂળ રકમ (મુદલ) પણ Google Pay મારફતે પરત કરી દીધી હતી.આમ છતાં, આરોપી મહિલા વધુ નાણાંની ઉઘરાણી કરી વિવેકભાઈને માનસિક રીતે હેરાન કરતી હતી.પત્નીને ધમકી અને આપઘાતનો પ્રયાસ
જ્યારે વિવેકભાઈ વધુ વ્યાજ આપવામાં અસમર્થ હતા, ત્યારે આરોપી જયાબેને તેમની ભાડાની દુકાને જઈ વિવેકભાઈની પત્ની સાથે અભદ્ર વર્તન કર્યું હતું. આરોપીએ ગાળાગાળી કરી “ખોટા કેસમાં ફસાવી દેવાની” ધમકી પણ આપી હતી. આ સતત વધતા ત્રાસ અને સામાજિક પ્રતિષ્ઠા ખરડાવાના ડરથી કંટાળીને વિવેકભાઈએ ફિનાઈલ પી આપઘાતનો પ્રયાસ કર્યો હતો. હાલમાં વિવેકભાઈ ભાનમાં આવતા તેમણે આપેલા નિવેદનના આધારે મોરબી સીટી એ ડિવિઝન પોલીસે આરોપી મહિલા વિરુદ્ધ મની લેન્ડિંગ એક્ટ અને ધમકી આપવા બદલ ગુન્હો નોંધી આગળની તપાસ અને કાયદેસરની કાર્યવાહી હાથ ધરી છે.
