MORBI:મોરબી “નવયુગમાં ગુંજ્યો કાનુડાનો નાદ — ભક્તિ, રાસ, રંગ અને સંસ્કાર સાથે જન્માષ્ટમીનો ભવ્ય ઉત્સવ”
MORBI:મોરબી “નવયુગમાં ગુંજ્યો કાનુડાનો નાદ — ભક્તિ, રાસ, રંગ અને સંસ્કાર સાથે જન્માષ્ટમીનો ભવ્ય ઉત્સવ”
નવયુગ ગ્રુપ ઓફ એજ્યુકેશન દ્વારા શ્રીકૃષ્ણ જન્મોત્સવની ભક્તિમય અને રંગારંગ ઉજવણી
નવયુગ ગ્રુપ ઓફ એજ્યુકેશન દ્વારા ભગવાન શ્રીકૃષ્ણના જન્મોત્સવ *જન્માષ્ટમી* પર્વની નવયુગ વિદ્યાલય, નવયુગ શૈક્ષણિક સંકુલ-વીરપર તથા નવયુગ ઇન્ટરનેશનલ પ્રિ-સ્કૂલ ખાતે ભક્તિ, સંસ્કાર, સંગીત અને ભારતીય સંસ્કૃતિના અનોખા સંગમ સાથે ભવ્ય ઉજવણી કરવામાં આવી હતી.
સમગ્ર નવયુગ પરિવાર જાણે *ગોકુળ-વૃંદાવનના રંગે રંગાયો હોય* તેવું મનમોહક વાતાવરણ સર્જાયું હતું. ક્યાંક રાધા-કૃષ્ણના રાસ, ક્યાંક મટકી ફોડનો ઉત્સાહ, ક્યાંક કૃષ્ણભક્તિના સૂર તો ક્યાંક મહાઆરતીના દિવ્ય પ્રકાશે સમગ્ર વાતાવરણ કૃષ્ણમય બન્યું હતું.
નવયુગ શૈક્ષણિક સંકુલ અને કોલેજ ખાતે ભવ્ય કૃષ્ણોત્સવ
કાર્યક્રમની શરૂઆત ભગવાન *શ્રીકૃષ્ણની ભાવભીની આરતી* સાથે કરવામાં આવી હતી. વિવિધ યુનિટના વિદ્યાર્થીઓ દ્વારા *રાસ, મણિયારો તથા શ્રીકૃષ્ણના જીવન અને સંસ્કૃતિ આધારિત વિવિધ કૃતિઓ* રજૂ કરવામાં આવી હતી.
વિશેષ આકર્ષણ તરીકે નવયુગના *ભૂતપૂર્વ અને વર્તમાન ગાયક તથા વાદન કલાકારો* એક મંચ પર આવ્યા હતા. તેમના દ્વારા *લાઈવ રિધમ સાથે કૃષ્ણ રાસ* અને કૃષ્ણભક્તિના સંગીતની મનમોહક રજૂઆત કરવામાં આવતા સમગ્ર સંકુલ કૃષ્ણના સૂરોમાં ઝૂમી ઊઠ્યું હતું.
ભગવાન શ્રીકૃષ્ણના જન્મપ્રસંગને જીવંત બનાવવા *મથુરાની જેલનું વિશેષ ડેકોરેશન અને ટેબ્લો* તૈયાર કરવામાં આવ્યું હતું. ભગવાનના જન્મથી લઈને ગોકુળ સુધીના પ્રસંગોની અનુભૂતિ કરાવતું આ સર્જન વિદ્યાર્થીઓ માટે વિશેષ આકર્ષણનું કેન્દ્ર બન્યું હતું.
વિવિધ યુનિટ દ્વારા *મટકી ફોડ-દહીં હાંડી* કાર્યક્રમ યોજાયો હતો, જેમાં વિદ્યાર્થીઓએ ભારે ઉત્સાહ અને ઉમંગ સાથે ભાગ લીધો હતો.
KGથી ધોરણ 5ના નાના ભૂલકાઓ દ્વારા *કૃષ્ણ-સુદામા* નાટ્યકૃતિ તથા *રાધા-કૃષ્ણ* રાસ રજૂ કરવામાં આવ્યા હતા. નાના બાળકોની નિર્દોષ અભિનયકલા અને કૃષ્ણમય વેશભૂષાએ સૌનું મન મોહી લીધું હતું.
નવયુગ વિદ્યાલયમાં છપ્પનભોગથી મહાઆરતી સુધી
નવયુગ વિદ્યાલય ખાતે પણ જન્માષ્ટમી પર્વની ભવ્ય ઉજવણી કરવામાં આવી હતી. ભગવાન શ્રીકૃષ્ણને છપ્પનભોગ અર્પણ કરી શ્રદ્ધા અને ભક્તિ વ્યક્ત કરવામાં આવી હતી.
વિદ્યાર્થીઓની સર્જનાત્મકતાને પ્રોત્સાહિત કરવા *મટકી ડેકોરેશન સ્પર્ધા તથા ઝૂલા ડેકોરેશન સ્પર્ધા* યોજવામાં આવી હતી. રંગબેરંગી અને કલાત્મક મટકીઓ તથા કાનુડાના સુંદર ઝૂલાઓએ સમગ્ર કેમ્પસને ગોકુળ જેવો માહોલ આપ્યો હતો.
વિદ્યાર્થીઓ દ્વારા સાંસ્કૃતિક રાસ રજૂ કરવામાં આવ્યો હતો અને ઉત્સાહભેર મટકી ફોડ કાર્યક્રમ યોજાયો હતો. અંતે ભગવાન શ્રીકૃષ્ણની મહાઆરતી સાથે સમગ્ર નવયુગ પરિવાર ભક્તિના રંગે રંગાયો હતો.
નવયુગ ઇન્ટરનેશનલ પ્રિ-સ્કૂલમાં બાળગોપાલોની મસ્તી
નવયુગ ઇન્ટરનેશનલ પ્રિ-સ્કૂલ ખાતે નાનકડાં ભૂલકાઓ માટે વિશેષ જન્માષ્ટમી કાર્યક્રમનું આયોજન કરવામાં આવ્યું હતું. *કાન્હા પૂજન અને આરતી, ટીચર દ્વારા ભક્તિ રાસ,* બાળકોનો ગરબા-રાસ તથા મટકી ફોડ જેવા કાર્યક્રમોએ ઉજવણીને યાદગાર બનાવી હતી.
રાધા-કૃષ્ણ અને બાળગોપાલની વેશભૂષામાં સજ્જ નાનકડાં બાળકો જાણે ગોકુળના નટખટ કાનુડા અને રાધારાણી બનીને આવ્યા હોય તેવું દૃશ્ય સર્જાયું હતું.* કાર્યક્રમના અંતે પ્રસાદ વિતરણ સાથે આ ભક્તિમય ઉજવણી પૂર્ણ થઈ હતી
જન્માષ્ટમીની આ ઉજવણી માત્ર મનોરંજન પૂરતી સીમિત ન રહી, પરંતુ વિદ્યાર્થીઓને ભગવાન શ્રીકૃષ્ણના જીવનમાંથી મિત્રતા, કર્તવ્ય, પ્રેમ, ધર્મ, સંસ્કાર અને જીવનમૂલ્યોનો સંદેશ મળે તેમજ નવી પેઢી ભારતીય સંસ્કૃતિ અને પરંપરા સાથે જોડાય તેવો સુંદર પ્રયાસ બની રહી.
આ પ્રસંગે નવયુગ ગ્રુપ ઓફ એજ્યુકેશનના પ્રમુખશ્રી *પી.ડી.કાંજીયા* એ સમગ્ર નવયુગ પરિવારને જન્માષ્ટમી પર્વની શુભકામનાઓ પાઠવતાં જણાવ્યું હતું કે, “શિક્ષણનો અર્થ માત્ર પુસ્તકી જ્ઞાન આપવો નથી, પરંતુ વિદ્યાર્થીઓને આપણી ભારતીય સંસ્કૃતિ, પરંપરા અને જીવનમૂલ્યો સાથે જોડવાનું પણ છે. ભગવાન શ્રીકૃષ્ણનું જીવન દરેક પરિસ્થિતિમાં કર્તવ્યનિષ્ઠ રહીને આગળ વધવાની પ્રેરણા આપે છે. નવયુગના વિદ્યાર્થીઓ જ્ઞાનની સાથે સંસ્કાર અને સંસ્કૃતિનો વારસો પણ જીવનમાં ઉતારે એ જ અમારો પ્રયાસ છે.”
તેમણે વિવિધ કૃતિઓ રજૂ કરનાર તમામ વિદ્યાર્થીઓ તથા તેમને તૈયાર કરનાર શિક્ષકોને અભિનંદન પાઠવ્યા હતા.
આ સમગ્ર જન્માષ્ટમી મહોત્સવને ભવ્ય, સુવ્યવસ્થિત અને યાદગાર બનાવવા માટે નવયુગ ગ્રુપ ઓફ એજ્યુકેશનના તમામ યુનિટના સ્ટાફમિત્રોએ ભારે જહેમત ઉઠાવી હતી. આયોજનથી લઈને ડેકોરેશન, સાંસ્કૃતિક કૃતિઓ, રાસ, આરતી, મટકી ફોડ અને અન્ય તમામ વ્યવસ્થાઓમાં સ્ટાફમિત્રોના સહયોગથી સમગ્ર કાર્યક્રમ સફળતાપૂર્વક સંપન્ન થયો હતો.
