MORBI:મોરબી ડેપ્યુટી કમિશનરે વોર્ડ નં. ૬ માં ઓચિંતું નિરીક્ષણ કર્યું.
મોરબી: શહેરની સ્વચ્છતા અને વહીવટી કામગીરીને વેગ આપવા માટે મોરબી મહાનગરપાલિકાના ડેપ્યુટી કમિશનર દ્વારા તારીખ ૦૪/૦૫/૨૦૨૬ ના રોજ વોર્ડ નં. ૬ ના વિવિધ વિસ્તારોની સર્વગ્રાહી મુલાકાત લેવામાં આવી હતી. આ મુલાકાત દરમિયાન સફાઈ વ્યવસ્થાથી લઈને પશુ નોંધણી સુધીની કામગીરીની સમીક્ષા કરવામાં આવી હતી.
મુલાકાતની શરૂઆતમાં ડેપ્યુટી કમિશનર દ્વારા વોર્ડના સફાઈ કર્મચારીઓની હાજરીની સખત ચકાસણી કરવામાં આવી હતી. ત્યારબાદ શહેરના નીચે મુજબના વિસ્તારોમાં સ્વચ્છતાની સમીક્ષા કરવામાં આવી:
મુખ્ય વિસ્તારો: પંખાળી શેરી, ગઢની રાંગ, ફૂલગાલી સોસાયટી, ખાટકીવાસ, નાગનાથ નાકા, ચૌહાણ શેરી અને જાની શેરી.
GVP પોઈન્ટ: રોહલાપીર દરગાહ પાસે આવેલા ગાર્બેજ વલ્નરેબલ પોઈન્ટ (GVP) ની મુલાકાત લઈ ત્યાં કચરાના નિકાલની વ્યવસ્થા તપાસી હતી.રહેણાંક વિસ્તારોમાં કચરાના નિકાલની પ્રક્રિયા તપાસવા માટે મોચી શેરી, વેરાઈ શેરી અને ગ્રીન ચોક ખાતે ડોર-ટુ-ડોર કચરા સંગ્રહ કામગીરીનું પ્રત્યક્ષ નિરીક્ષણ કરવામાં આવ્યું હતું.ખાટકીવાસ અને ગ્રીન ચોક વિસ્તારમાં પશુ માલિકોએ નોંધણી કરાવી છે કે નહીં તેની વિગતો તપાસવામાં આવી હતી.
ધાર્મિક સ્થળો: લક્ષ્મી માતાનું મંદિર અને પંચેશ્વર મહાદેવ મંદિરની મુલાકાત લઈ ત્યાંની વ્યવસ્થાની પણ સમીક્ષા કરાઈ હતી.વહીવટી તંત્ર દ્વારા કડક વલણ અપનાવતા, જે વિસ્તારોમાં જાહેર માર્ગો પર પાણીનો બગાડ થતો જોવા મળ્યો હતો, તેવા ઇસમો વિરુદ્ધ સ્થળ પર જ દંડની કાર્યવાહી કરવામાં આવી હતી.ડેપ્યુટી કમિશનરની આ સપાટાબંધ કામગીરીથી વોર્ડ નં. ૬ ના રહીશોમાં જાગૃતિ જોવા મળી હતી અને તંત્ર દ્વારા આગામી દિવસોમાં પણ આવી ઝુંબેશ ચાલુ રાખવાના સંકેત આપવામાં આવ્યા છે.
