MORBI:મોરબી જિલ્લામાં ગૌચર અને ખરાબા જમીનો પર દબાણનો પ્રશ્ન: તંત્રની નિષ્ક્રિયતા સામે ઉઠતા સવાલો
MORBI:મોરબી જિલ્લામાં ગૌચર અને ખરાબા જમીનો પર દબાણનો પ્રશ્ન: તંત્રની નિષ્ક્રિયતા સામે ઉઠતા સવાલો
મોરબી, તા. ૨૦: મોરબી જિલ્લામાં આશરે ૩૫૦થી વધુ ગ્રામ્ય વિસ્તારો આવેલા છે, જ્યાં અગાઉ મોટા પ્રમાણમાં ગૌચર અને ખરાબા જમીનો જોવા મળતી હતી. ગ્રામ્ય વિસ્તારોમાં પશુપાલન અને જાહેર હિત માટે મહત્વની ગણાતી આ જમીનો હાલ વિકાસની દોડ અને વધતા દબાણોના કારણે ધીમે-ધીમે અદ્રશ્ય થતી હોવાના આક્ષેપો ઉઠી રહ્યા છે.સ્થાનિક સ્તરે ચર્ચાતી વિગતો મુજબ, સરકારી રેકોર્ડમાં ગૌચર અને ખરાબા જમીનો નોંધાયેલ હોવા છતાં, વાસ્તવિક સ્થિતિમાં ઘણી જગ્યાએ ગેરકાયદેસર બાંધકામો, તબેલા, હોટલ-રેસ્ટોરન્ટ અથવા અન્ય વ્યાવસાયિક પ્રવૃત્તિઓ ઉભી થઈ ગયાની ફરિયાદો સામે આવી રહી છે. ખાસ કરીને ઉદ્યોગ વિસ્તારો અને મોટા કારખાનાઓની આસપાસ આવી જમીનોના અસ્તિત્વ અંગે પ્રશ્નો ઉઠાવવામાં આવી રહ્યા છે.
જિલ્લાના અનેક ગામોમાં સ્થાનિક લોકો અને બુદ્ધિજીવીઓનું માનવું છે કે વર્ષો પહેલાં જે ગૌચર અને ખરાબા જમીનો હતી, તે આજે કાગળ પર તો છે પરંતુ સ્થળ પર જોવા મળતી નથી. આ પરિસ્થિતિમાં સ્થાનિક સ્વરાજ્ય સંસ્થાઓ, સરપંચો, તલાટી મંત્રીઓ તેમજ જિલ્લા કક્ષાના જવાબદાર અધિકારીઓની ભૂમિકા અંગે પણ ચર્ચાઓ થઈ રહી છે.
વિશ્લેષકોનું માનવું છે કે જો દબાણની શરૂઆતમાં જ તંત્ર સતર્ક બને અને સમયસર કાર્યવાહી કરે તો બાદમાં ડિમોલેશન જેવી ખર્ચાળ કામગીરી ટાળી શકાય તેમજ ગેરકાયદેસર બાંધકામોને અટકાવી શકાય. ગૌચર અને ખરાબા જેવી સરકારી જમીનોનું સંરક્ષણ ગ્રામ્ય અર્થતંત્ર અને પશુપાલન માટે પણ મહત્વપૂર્ણ માનવામાં આવે છે.
જાહેર હિતને ધ્યાનમાં રાખી ગૌચર અને ખરાબા જમીનો બચાવવા માટે વિશેષ અભિયાન હાથ ધરવાની જરૂરિયાત પણ વ્યક્ત થઈ રહી છે. જોકે, આ મુદ્દે સંબંધિત તંત્રનો સત્તાવાર અભિપ્રાય મેળવવો બાકી છે.જાહેર હિત અને મૂગા પશુઓના અધિકારોને ધ્યાનમાં રાખીને મોરબી જિલ્લામાં ગૌચર અને ખરાબાની જમીનોને દબાણમુક્ત કરવા માટે વહીવટી તંત્ર દ્વારા એક ‘વિશેષ અભિયાન’ કે મેગા ડ્રાઈવ હાથ ધરવામાં આવે તેવી લોકમાંગ પ્રબળ બની છે.હવે જોવાનું એ રહે છે કે તંત્ર જાગશે કે પછી સરકારી જમીનો આમ જ ભૂમાફિયાઓનો કોળિયો બનતી રહેશે.
