MORBI:મોરબીને ઝળહળતું કરવા મહાનગરપાલિકા દ્વારા: નવા સ્ટ્રીટ લાઈટ પોલ અને હાઈ માસ્ટ લાઈટોનું કામ પૂરજોશમાં
મોરબીને ઝળહળતું કરવા મહાનગરપાલિકા દ્વારા: નવા સ્ટ્રીટ લાઈટ પોલ અને હાઈ માસ્ટ લાઈટોનું કામ પૂરજોશમાં
મોરબી શહેરને વધુ પ્રકાશિત અને સુવિધાસભર બનાવવાના હેતુથી મોરબી મહાનગરપાલિકાની ઇલેક્ટ્રિકલ શાખા દ્વારા શહેરી વિસ્તારમાં લાઈટિંગ વ્યવસ્થા મજબૂત કરવાની કામગીરી હાથ ધરવામાં આવી છે. શહેરના મુખ્ય માર્ગો પર નવી સ્ટ્રીટ લાઈટો, પોલ અને હાઈ માસ્ટ લાઈટો નાખવાની પ્રક્રિયા અત્યારે પ્રગતિ હેઠળ છે.
મહાનગરપાલિકાના જણાવ્યા અનુસાર, શહેરના ટ્રાફિકથી ધમધમતા વિસ્તારોમાં લાઈટિંગની સુવિધા વધારવા માટે નીચે મુજબના આયોજન કરવામાં આવ્યા છે:
મહેન્દ્ર નગર થી પીપળી રોડ: આ વિસ્તારમાં હદ સુધી સ્ટ્રીટ લાઈટ સાથેના નવા પોલ સ્થાપિત કરવાનું કામ સફળતાપૂર્વક પૂર્ણ કરી દેવામાં આવ્યું છે.
નવલખી રોડ થી શ્રદ્ધા પાર્ક: આ માર્ગ પર નવા લાઈટ પોલ ઉભા કરવાની કામગીરી હાલ ગતિમાં છે, જે ટૂંક સમયમાં પૂર્ણ થશે.
શહેરના 12 મહત્વના સ્થળોએ લાગશે ‘હાઈ માસ્ટ લાઈટ’
શહેરના ચૌટા અને મુખ્ય જંકશનોને રાત્રિના સમયે દૂધિયા રોશનીથી નવડાવવા માટે કુલ 12 સ્થળોએ હાઈ માસ્ટ લાઈટ નાખવાનું નક્કી કરાયું છે. જેમાં નીચેના મુખ્ય સ્થળોનો સમાવેશ થાય છે:
ત્રાજપર ચોકડી,કલેક્ટર ઓફિસ રોડ,અરુણોદય સર્કલ,દરબારગઢ (ખોડીયાર માતાના મંદિર પાસે),શિવાજી ચોક (જેલ રોડ) ,સરદાર સ્ટેચ્યુ (એસ.ડી.એમ. બંગલા પાસે)
“મોરબી શહેરને વધુ આકર્ષક અને સુરક્ષિત બનાવવા માટે લાઈટિંગ સંબંધિત તમામ સમસ્યાઓનું ઝડપી નિવારણ કરવામાં આવશે. આગામી દિવસોમાં શહેરની જરૂરિયાત મુજબ તમામ વિસ્તારોને આવરી લેવા મહાનગરપાલિકા કટિબદ્ધ છે.” — ઇલેક્ટ્રિકલ શાખા, મોરબી મહાનગરપાલિકા
આ પ્રોજેક્ટ પૂર્ણ થતાની સાથે જ મોરબી શહેરની રોનક બદલાશે અને વાહનચાલકો તેમજ રાહદારીઓને રાત્રિના સમયે પડતી મુશ્કેલીઓનો કાયમી અંત આવશે.
