માર્ગ અકસ્માતના ભોગ બનનાર નાગરિકો માટે ‘PM RAHAT’ યોજના હેઠળ ₹૧.૫ લાખ સુધીની મફત કેશલેસ સારવાર
પંચમહાલ ગોધરા
નિલેશભાઈ દરજી શહેરા
માર્ગ અકસ્માત દરમિયાન ‘ગોલ્ડન અવર’ (અકસ્માત બાદનો પ્રથમ કલાક) માં ઈજાગ્રસ્ત વ્યક્તિને ત્વરિત સારવાર મળી રહે અને કિંમતી જીવ બચાવી શકાય તેવા ઉમદા હેતુથી ભારત સરકાર દ્વારા ‘PM RAHAT’ (કેશલેસ ટ્રીટમેન્ટ સ્કીમ) અમલમાં મૂકવામાં આવી છે.
પંચમહાલ જિલ્લાના તમામ નાગરિકો આ મહત્વપૂર્ણ યોજનાથી માહિતગાર થાય તે માટે આર.ટી.ઓ. ગોધરા દ્વારા ખાસ વિગતો જાહેર કરવામાં આવી છે.
આ યોજના અંતર્ગત માર્ગ અકસ્માતનો ભોગ બનનાર કોઈપણ વ્યક્તિને હોસ્પિટલમાં દાખલ થયાના પ્રથમ ૭ દિવસ સુધી અથવા મહત્તમ ₹૧.૫ લાખ સુધીની કેશલેસ સારવાર વિનામૂલ્યે પૂરી પાડવામાં આવશે.
યોજનાની મુખ્ય વિશેષતાઓ:
ત્વરિત સારવાર: અકસ્માતના ભોગ બનેલી વ્યક્તિને નાણાંની ચિંતા કર્યા વગર તાત્કાલિક સારવાર મળશે.
મર્યાદા: અકસ્માત દીઠ વ્યક્તિગત રીતે ₹૧.૫ લાખ સુધીની સારવાર મફત મળશે.
હોસ્પિટલ નેટવર્ક: આ યોજના હેઠળ સૂચિબદ્ધ (Empaneled) તમામ ખાનગી અને સરકારી હોસ્પિટલોમાં આ સુવિધા ઉપલબ્ધ રહેશે.
ગોલ્ડન અવરનો ઉપયોગ: અકસ્માત પછીના પ્રથમ કલાકમાં સારવાર શરૂ કરીને મૃત્યુદરમાં ઘટાડો કરવાનો મુખ્ય લક્ષ્ય છે.
કોઈ કાર્ડની જરૂર નથી: આ યોજનાનો લાભ લેવા માટે કોઈ પણ પ્રકારના પૂર્વ-નોંધણી કાર્ડની જરૂર નથી, અકસ્માતગ્રસ્ત વ્યક્તિ સીધી જ આ સેવાનો લાભ મેળવી શકે છે.
પ્રાદેશિક પરિવહન અધિકારી, ગોધરા દ્વારા જિલ્લાના તમામ નાગરિકોને અપીલ કરવામાં આવી છે કે, અકસ્માતના સમયે ગભરાવાને બદલે ભોગ બનનારને તુરંત નજીકની અધિકૃત હોસ્પિટલમાં ખસેડી આ યોજનાનો લાભ અપાવવો. વધુ વિગતો માટે પરિવહન વિભાગની અધિકૃત વેબસાઈટ અથવા આર.ટી.ઓ. કચેરીનો સંપર્ક કરવા જણાવાયું છે.
