Rajkot: “યોગા ફોર વન અર્થ, વન હેલ્થ” વરસાદી માહોલને ધ્યાને લઈ ૧૧ માં “આંતરરાષ્ટ્રીય યોગ દિવસ”ની જિલ્લા કક્ષાની ઉજવણી લોધિકાના બદલે રાજકોટ ખાતે કરાશે
તા.૧૮/૬/૨૦૨૫
વાત્સલ્યમ્ સમાચાર
કાલાવાડ રોડ ખાતેના મલ્ટી પર્પઝ સ્પોર્ટ્સ સંકુલ ખાતે કરાશે આંતરરાષ્ટ્રીય યોગ દિવસની ઉજવણી
Rajkot: વરસાદી માહોલને ધ્યાને લઈને ૧૧માં “આંતરરાષ્ટ્રીય યોગ દિવસ”ની ઉજવણીના કાર્યક્રમ સંદર્ભે જિલ્લા વિકાસ અધિકારી શ્રી અનંદુ સુરેશ ગોવિંદના અઘ્યક્ષસ્થાને ક્લેક્ટર કચેરી ખાતે બેઠક યોજાઈ હતી. જે અન્વયે આગામી તા.૨૧ જૂનના રોજ રાજકોટ જિલ્લામાં આંતરરાષ્ટ્રીય યોગ દિવસની જિલ્લા કક્ષાની ઉજવણી લોધિકા સ્પોર્ટ સંકુલ ખાતે થવાની હતી, પરંતુ વરસાદી સ્થિતિને ધ્યાને રાખીને હવે જિલ્લા કક્ષાની ઉજવણી કાલાવાડ રોડ ખાતેના મલ્ટી પર્પઝ સ્પોર્ટ્સ સંકુલ, રાજકોટ ખાતે કરવામાં આવશે.
આ તકે જિલ્લા વિકાસ અધિકારીશ્રીએ કાર્યક્રમની રૂપરેખા જણાવીને સ્થળની બેઠક વ્યવસ્થા, પોલીસ બંદોબસ્ત, પરિવહન – પાર્કિંગ વ્યવસ્થા, મેડિકલ વ્યવસ્થા, લાઈવ પ્રસારણ, પ્રચાર – પ્રસાર, પીવાના પાણીની વ્યવસ્થા, સ્વચ્છતા જાળવવા સહિતની કામગીરી અંગે સંબંધિત અધિકારીશ્રીઓ સાથે વિસ્તૃત ચર્ચા કરીને જરૂરી માર્ગદર્શન પૂરું પાડ્યું હતું. તેમજ સંબંધિત અધિકારીશ્રીઓને સ્થળ મુલાકાત કરીને નક્કર આયોજન કરવા જણાવ્યું હતું. તેમજ વધુમાં વધુ લોકોને સ્વસ્થ અને તંદુરસ્ત જીવન શૈલી માટે યોગના મહત્વને સમજીને કાર્યક્રમમાં સહભાગી થવા અને પોતાના ઘરે પણ યોગા કરીને યોગાને રોજિંદા જીવનનો ભાગ બનાવવા અપીલ કરી હતી
આ બેઠકમાં નિવાસી અધિક ક્લેક્ટર શ્રી એ.કે.ગૌતમ, જિલ્લા ગ્રામ વિકાસ એજન્સીના નિયામકશ્રી એ.કે.વસ્તાણી, પ્રાંત અધિકારીશ્રી ચાંદની પરમાર, જિલ્લા રમત વિકાસ અધિકારીશ્રી રમા મદ્રા, જિલ્લા યુવા વિકાસ અધિકારીશ્રી હિતેશ દિહોરા સહિત સંબંધિત વિભાગના અધિકારીશ્રીઓ અને કર્મચારીશ્રીઓ ઉપસ્થિત રહ્યા હતા.
