વર્ષ 2022 થી ચાલી રહેલા રશિયા અને યુક્રેન વચ્ચેના ભીષણ યુદ્ધમાં પ્રથમ વખત શાંતિની મોટી આશા જાગી છે. અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે સોશિયલ મીડિયા પ્લેટફોર્મ ‘ટ્રુથ સોશિયલ’ પર એક સનસનાટીભર્યા સમાચાર શેર કરતા જાહેરાત કરી છે કે બંને દેશો વચ્ચે 9 મે થી 11 મે સુધી એટલે કે ત્રણ દિવસ માટે સીઝફાયર (યુદ્ધવિરામ) લાગુ કરવામાં આવ્યો છે. ટ્રમ્પે દાવો કર્યો છે કે આ સમયગાળા દરમિયાન કોઈ પણ પ્રકારની સૈન્ય ગતિવિધિઓ થશે નહીં અને બંને દેશો એકબીજા પર હથિયારોથી હુમલો કરશે નહીં. આ નિર્ણયને આંતરરાષ્ટ્રીય સ્તરે યુદ્ધના અંતની શરૂઆત તરીકે જોવામાં આવી રહ્યો છે.
ડોનાલ્ડ ટ્રમ્પે પોતાની પોસ્ટમાં જણાવ્યું હતું કે આ ત્રણ દિવસના યુદ્ધવિરામ દરમિયાન માનવીય દ્રષ્ટિકોણથી એક મોટો નિર્ણય લેવામાં આવ્યો છે, જેમાં રશિયા અને યુક્રેન પોતપોતાના ૧૦૦૦-૧૦૦૦ યુદ્ધકેદીઓની અદલાબદલી કરશે. ટ્રમ્પના મતે, આ પહેલ તેમણે પોતે સીધી રીતે કરી હતી અને રશિયાના રાષ્ટ્રપતિ વ્લાદિમીર પુતિન તેમજ યુક્રેનના રાષ્ટ્રપતિ વોલોદિમીર જેલેન્સ્કી આ શરતો પર સહમત થયા છે. ટ્રમ્પે આશા વ્યક્ત કરી છે કે આ પગલું આ લાંબા અને જીવલેણ સંઘર્ષના અંતની દિશામાં એક મજબૂત પાયો સાબિત થશે અને આગામી દિવસોમાં પૂર્ણ યુદ્ધવિરામ માટેની મંત્રણાઓને વેગ મળશે.
સીઝફાયરના સમયગાળા પાછળ એક ખાસ ઐતિહાસિક મહત્વ પણ રહેલું છે. 9 મે ના રોજ રશિયા પોતાનો ‘વિક્ટ્રી ડે’ ઉજવે છે, જે બીજા વિશ્વયુદ્ધમાં નાઝી જર્મની પર મેળવેલી જીતની યાદમાં મનાવવામાં આવે છે. ટ્રમ્પે તેમના નિવેદનમાં નોંધ્યું હતું કે બીજા વિશ્વયુદ્ધમાં યુક્રેને પણ ખૂબ મોટી અને મહત્વની ભૂમિકા ભજવી હતી, તેથી આ દિવસ બંને દેશો માટે સન્માન અને સ્મૃતિનો દિવસ છે. આ જ કારણ છે કે વિક્ટ્રી ડેના પવિત્ર અવસરે યુદ્ધ અટકાવવા માટે બંને પક્ષો રાજી થયા છે. આ ત્રણ દિવસ દરમિયાન શાંતિ જાળવી રાખવા અને ભવિષ્યના કાયમી ઉકેલ માટે ચર્ચાઓ શરૂ કરવાની પણ યોજના છે.
નોંધનીય છે કે ફેબ્રુઆરી ૨૦૨૨ માં શરૂ થયેલા આ યુદ્ધમાં અત્યાર સુધીમાં હજારો સૈનિકો અને નાગરિકોના મોત થયા છે, જ્યારે લાખો લોકોએ વિસ્થાપિત થવું પડ્યું છે. રશિયા અને યુક્રેન વચ્ચેની આ લડાઈને કારણે વૈશ્વિક અર્થવ્યવસ્થા અને સુરક્ષા પર પણ ઊંડી અસર પડી છે. અગાઉ અનેક વખત મંત્રણાઓ નિષ્ફળ ગઈ હતી, પરંતુ ડોનાલ્ડ ટ્રમ્પના મધ્યસ્થી તરીકેના આગમન બાદ પ્રથમ વખત આટલો મોટો પ્રગતિશીલ નિર્ણય લેવામાં આવ્યો છે. ટ્રમ્પે ભારપૂર્વક કહ્યું છે કે બંને દેશો વચ્ચે સમજૂતીની શક્યતા અત્યારે પહેલા કરતા ઘણી વધારે છે અને તેઓ આ પ્રક્રિયા પર સતત નજર રાખી રહ્યા છે.
