હવામાન દ્વારા 31 ઓગસ્ટે ઉત્તર પ્રદેશથી છત્તીસગઢ, બિહાર, ઝારખંડ અને બીજા અનેક રાજ્યોમાં ભારેથી અતિભારે વરસાદની ચેતવણી આપવામાં આવી છે. જેમાં દિલ્હીમાં ગરમી યથાવત રહેશે જ્યારે અમુક રાજ્યોમાં પૂરની સ્થિતિ વણસી શકે છે. સોમવાર 31 ઓગસ્ટે દેશના અનેક રાજ્યોમાં વરસાદનો મિજાજ ફરી એકવાર બદલાઈ રહ્યો છે. જેમાં હવામાન વિભાગે ઉત્તર પ્રદેશથી લઈને છત્તીસગઢ અને ઓડિશા સુધીના કેટલાક વિસ્તારોમાં ભારેથી અતિભારે વરસાદની ચેતવણી આપી છે. જેમાં અમુક ભાગોમાં આંધી-તોફાનની પણ સંભાવના છે.
ગંગાના મેદાની વિસ્તારોવાળા પશ્ચિમ બંગાળ અને ઝારખંડમાં ક્યાંક ક્યાંક ભારેથી અતિભારે વરસાદ થઈ શકે છે. છત્તીસગઢમાં સોમવારે ક્યાંક ખુબ ભારે વરસાદ પડવાની શક્યતા છે. અરુણાચલ પ્રદેશ, બિહાર, પૂર્વી ઉત્તર પ્રદેશ, ઝારખંડ, નાગાલેન્ડ, મણિપુર, મિઝોરમ, ત્રિપુરા અને ઉત્તરાખંડમાં પણ ભારે વરસાદની અપેક્ષા છે. આસામ, મેઘાલય, પૂર્વી મધ્ય પ્રદેશ, હિમાચલ પ્રદેશ, જમ્મુ-કાશ્મીર, લદ્દાખ, પશ્ચિમ બંગાળ, સિક્કિમ અને પશ્ચિમી ઉત્તર પ્રદેશના અમુક વિસ્તારોમાં અતિભારે વરસાદ થઈ શકે છે.
અંડમાન-નિકોબાર, આંધ્ર પ્રદેશ, પશ્ચિમ બંગાળ, ઓડિશા, તમિલનાડુ અને પુડુચેરીના કેટલાક ભાગોમાં વાદળી સાથે વીજળી અને તીવ્ર પવન સાથે તોફાન આવવાની સંભાવના છે. આ સમયે 40થી 50 કિલોમીટર પ્રતિ કલાકની ઝડપે પવનો ફૂંકાઈ શકે છે.
હિમાચલ પ્રદેશમાં આગામી ચાર દિવસ માટે ભારે વરસાદનું યલો અલર્ટ આપવામાં આવ્યું છે. 31 ઓગસ્ટથી 3 સપ્ટેમ્બર સુધી રાજ્યના અલગ-અલગ સ્થાનો પર ભારે વરસાદની શક્યતા છે. આ વર્ષે રાજ્યમાં વરસાદને કારણે 30 જૂનથી અત્યાર સુધીમાં આશરે 103 લોકોના મોત થયા છે અને 1184 કરોડ રૂપિયાનું નુકસાન થયું છે.
દિલ્હી-એનસીઆરમાં હજુ ગરમીમાંથી રાહત મળવાની સંભાવના ઓછી છે. સોમવારે મહત્તમ તાપમાન 35થી 37 ડિગ્રી સેલ્સિયસ અને મીનીમમ 25 થી 27 ડિગ્રી સેલ્સિયસ રહેવાની અપેક્ષા છે. મોટાભાગના વિસ્તારોમાં તાપમાન સામાન્યથી 3 ડિગ્રી સુધી વધુ રહી શકે છે.
ઉત્તર પ્રદેશ અને મધ્ય પ્રદેશના અનેક ભાગોમાં પૂરની સ્થિતિ વણસી રહી છે. મધ્ય પ્રદેશમાં ચિત્રકૂટ, સતના, છતરપુર, ટીકમગઢ અને પન્ના જિલ્લાઓમાં સતત વરસાદને કારણે જળભરાવ અને પૂર જેવી સ્થિતિ સર્જાઈ છે. મંદાકિની નદી લગભગ 30 ફૂટની ઊંચાઈથી વહી રહી છે. બિહારમાં નેપાળમાં આવેલા પૂરને કારણે ગંગા અને ગંડક નદીઓનું પાણી વધ્યું છે અને 6 જિલ્લાઓને એલર્ટ પર રાખવામાં આવ્યા છે. પટનામાં દીઘા ઘાટ સંપૂર્ણરીતે ડૂબી ગયો છે.
