સમીર પટેલ, ભરૂચ
અંકલેશ્વર GIDCમાંથી ફરી એકવાર ડ્રગ્સનો કાળો કારોબાર ઝડપાયો છે. સુરત અને ભરૂચ પોલીસે 20 ઓક્ટોબરની મોડી રાત્રે સંયુક્ત ઓપરેશન હાથ ધરી અવસર એન્ટરપ્રાઇઝમાંથી 250 કરોડનું ડ્રગ્સ ઝડપી પાડ્યું છે. પોલીસે 14.10 લાખનું 141 ગ્રામ ડ્રગ્સ કબજે કર્યું છે. અન્ય 427 કિલો ડ્રગ્સનો જથ્થો હાલ ચકાસણી અર્થે FSLમાં મોકલવામાં આવ્યો છે. પોલીસે કંપની સંચાલક વિશાલ પટેલ સહિત અન્ય 2 આરોપીની પણ ધરપકડ કરી છે. જ્યારે કંપનીનો માલિક વિદેશમાં હોવાની જાણકારી મળી છે. અંકલેશ્વર GIDCમાંથી 13મી ઓક્ટબરે આવકાર ડ્રગ્સ નામની ફેક્ટરીમાંથી 5,000 કરોડનું 518 કિલો કોકેન ઝડપાયું હતું. ત્યારે હવે આવકાર ફેક્ટરીથી માત્ર દોઢ કિલોમીટર દૂર અવસર ફેક્ટરીમાંથી 250 કરોડનું ડ્રગ્સ ઝડપાયું છે.
જો કે આ ડ્રગ્સ ઝડપાવાની લિંક સુરતના વેલંજામાંથી મળી હતી. સુરત ક્રાઇમ બ્રાન્ચે સુલંજામાંથી 2 કરોડનું 2100 ગ્રામ એમ.ડી ડ્રગ્સ ઝડપી પાડ્યું હતું અને ત્રણ લોકોની ધરપકડ કરી હતી. તેમની પૂછપરછમાં જાણવા મળ્યું હતું કે, તેઓએ આ જથ્થો અંકલેશ્વરથી લઈને આવ્યા હતા. જેથી તપાસમાં અંકલેશ્વર લિંક બહાર આવતા પોલીસ ત્યાં પણ તપાસ કરી હતી. આમ અંકલેશ્વરમાં તપાસ કરતા અવસર એન્ટરપ્રાઈઝમાંથી ડ્રગ્સ મળી આવ્યું હતું.
અંકલેશ્વર જીઆઇડીસીની અવસર એન્ટરપ્રાઈઝ કંપનીમાં 18 કલાક બાદ પોલીસની તપાસ પૂર્ણ થઈ છે. પોલીસ કંપની સંચાલક વિશાલ પટેલને લઇ સુરત જવા રવાના થઈ ગઈ છે. અંકલેશ્વરની અવસર એન્ટરપ્રાઈઝમાંથી પોલીસે કરોડો રૂપિયાનું ડ્રગ્સનું શંકાસ્પદ રો-મટીરીયલ ઝડપી પાડ્યું છે.
સુરત ક્રાઈમ બ્રાન્ચ, ગ્રામ્ય SOG દ્વારા સંયુક્ત ઓપરેશન કરી મોટી માત્રામાં એમડી ડ્રગ્સનો જથ્થો ઝડપી પાડવામાં આવ્યો હતો. આ સમગ્ર મામલે ત્રણ લોકોની ધરપકડ કરવામાં આવી છે. આરોપી અંકલેશ્વરથી સ્કોડા કાર નંબર GJ 16 DK 3299માં ડ્રગ્સનો જથ્થો લઈને જઈ રહ્યા હતા. જેની જાણકારી સુરત ક્રાઈમ બ્રાન્ચને મળી હતી. પોલીસ રાજ હોટલથી વેલંજા તરફ જતા રોડ પરથી કારને ઝડપી પાડ્યો છે.
આ કારમાંથી મોન્ટુ પટેલ, વિરાટ પટેલ અને વિપુલ પટેલની ધરપકડ કરવામાં આવી છે. પોલીસે તેમની પાસેથી 2100 ગ્રામ એમડી ડ્રગ્સનો જથ્થો કબજો કરી કાયદેસરની કાર્યવાહી ધરી છે. આરોપીઓ પાસેથી ત્રણ મોબાઈલ પણ મળી આવ્યા હતા.
આ સમગ્ર મામલે સુરત પોલીસ કમિશનર અનુપમસિંહ ગહેલોતએ જણાવ્યું હતું કે, સુરત શહેર ક્રાઈમ બ્રાન્ચની ઘણા દિવસોથી અલગ અલગ પ્રકારના ડ્રગ્સના રેકેટ અને કાર્ટેલ્સ તેમજ ડ્રગ્સ સપ્લાય કરનાર લોકો ઉપર નજર હતી. ઘણા બધા કેસ કરવામાં આવ્યા છે. અમે આ કેસમાં લિંક શોધી રહ્યા હતા. ક્યાંથી કઈ કાર્ટેલ કામ કરે છે, કઈ રીતે બનાવે છે, ક્યાં સપ્લાય કરવામાં આવે છે. એના ભાગરૂપે સુરત ક્રાઈમ બ્રાન્ચને સફળતા મળી. સુરત ગ્રામ્યના વેલંજા ગામથી ત્રણ લોકોની લોકોની ધરપકડ કરવામાં આવી છે. બે કિલોથી પણ વધુ એમડી ડ્રગ્સના જથ્થા કબજે કરાયો છે.
જ્યારે ભરૂચ જિલ્લાના અંકલેશ્વરમાં પોલીસની મદદથી ત્યાં પણ અત્યારે અમે સર્ચ કર્યું હતું. અમને કેટલોક મુદ્દામાલ મળી આવ્યો છે. તેના આધારે એફએસએલના ચકાસણી કરવામાં આવશે કે તે ક્યા સ્ટેજમાં છે, કારણ કે ડ્રગ્સ બનાવવાના ચાર સ્ટેજ હોય છે.
આ મામલે રાજ્યના ગૃહ મંત્રીએ જણાવ્યું હતું કે, ગુજરાત અને સુરત પોલીસ જે પ્રકારે ડ્રગ્સની સામે અભિયાન નહીં પરંતુ એક જંગ લડી રહી છે. આ જંગને આગળ વધારતા સુરત પોલીસ ક્રાઈમ બ્રાન્ચ દ્વારા 2100 ગ્રામ ડ્રગ્સ પકડવામાં સફળતા મળી છે. સુરત જિલ્લામાંથી ડ્રગ પકડ્યા બાદ એની ટેલ ભરૂચ જિલ્લા સુધી પહોંચી છે જ્યાં ઓપરેશન ચાલુ છે. સુરત પોલીસ દ્વારા કામગીરી ખૂબ જ સફળતાપૂર્વક પાર પાડવામાં આવી છે. અનેક દિવસોથી સુરત પોલીસ દ્વારા વોચ રાખવામાં આવી રહી હતી.
એશિયાની સૌથી મોટી ઔદ્યોગિક વસાહત અંકલેશ્વરની આવકાર ડ્રગ્સ નામની ફેક્ટરીમાંથી 13 ઓક્ટોબરના રોજ 5,000 કરોડનું 518 કિલો કોકેન ઝડપાયું હતું. આ મામલે પોલીસે મોડીરાત્રે કંપનીના 3 ડિરેક્ટર સહિત કુલ 5 લોકોની ધરપકડ કરી હતી. પોલીસે મોડીરાત્રે કંપનીના ડિરેક્ટર અશ્વિન રામાણી, બ્રિજેશ કોઠિયા, વિજય ભેસાણિયા તેમજ અન્ય 2 કેમિસ્ટની ધરપકડ કરી હતી. આ પાંચેય આરોપીને કોર્ટમાં રજૂ કરવામાં આવ્યા હતા. કોર્ટે આરોપીઓના 72 કલાકના ટ્રાન્ઝિટ રિમાન્ડ મંજૂર કર્યા હતા.
ઓગસ્ટના પહેલા વીકમાં સ્પેશિયલ સેલને કેન્દ્રીય એજન્સી તરફથી એક બાતમી મળે છે, જેથી કેટલાક લોકો પર નજર રાખીને બેઠી. આ દરમિયાન 2 ઓક્ટોબરે શિકાર જાળમાં ફસાઈ ગયો. સ્પેશિયલ સેલે ગોદામ પર રેડ કરી 562 કિલો કોકેન અને 40 કિલો હાઇડ્રોપેનિક ગાંજાની ખેપ જપ્ત કરી. તપાસ દરમિયાન 10 ઓક્ટોબરે દિલ્હીના રમેશનગરની એક દુકાનમાંથી 208 કિલો વધુ કોકેન ઝડપાયું, જેની કુલ કિંમત 5000 કરોડ હતી. એની સાથે તુષાર ગોયલ, હિમાંશુ અને ઔરંગઝેબ નામના શખસને પકડી લેવામાં આવ્યા હતા.
ત્યાર બાદ 13 ઓક્ટોબરે દિલ્હી અને ભરૂચ પોલીસ સંયુક્ત ઓપરેશન હાથ ધરી અંકલેશ્વર GIDCના પ્લોટ નંબર 3708માં આવકાર ડ્રગ્સ પ્રા.લિ.માંથી 518 કિલો સોલ્ટ ફોર્મમાં કોકેન અને મેથનો જથ્થો ઝડપી લીધો હતો. આ ઓપરેશનનું દિલ્હી સાથે સીધું કનેક્શન સામે આવ્યું હતું. દિલ્હીના મહિપાલપુર અને રમેશનગરમાંથી ઝડપાયેલા કોકેન કેસના આરોપીઓએ પૂછપરછમાં સ્પેશિયલ સેલને જણાવ્યું કે આ નશીલો પદાર્થ ફાર્મા સોલ્યુશન સર્વિસ કંપનીનો હતો અને એ અંકલેશ્વર GIDCમાં આવેલી આવકાર ડ્રગ્સ પ્રા.લિ. કંપનીમાંથી આવ્યો હતો.
આ ત્રણેય રેડ મળીને કૂલ 1288 કિલો ડ્રગ્સનો આખો મામલો છે, જે દેશના ઇતિહાસમાં કોકેનનો સૌથી મોટો જથ્થો હોવાનું કહેવાઈ રહ્યું છે. આવકાર ડ્રગ્સની સ્થાપના વર્ષ 2016માં થઈ હતી. સૂત્રો મુજબ દુબઈથી ડ્રગ્સ આવ્યું હતું અને દિલ્હી-એનસીઆર મોકલતાં પહેલાં એની પ્રોસેસ કરાઇ હતી. ડ્રગ્સને ગુજરાતની બહાર ‘મેડિકલ કન્સાઈન્મેન્ટ’ તરીકે લઈ જવાયું હતું અને પછી ‘ફાર્મા સોલ્યુશન્સ સર્વિસીઝ’ના નામે ડોક્યુમેન્ટ પર કથિત નકલી ફાર્મા કંપનીને સોંપાયું હતું. આ ડ્રગ સિન્ડિકેટનું કનેક્શન દુબઈ અને બ્રિટન સાથે જોડાયેલું હોવાનું કહેવાય છે.
અંકલેશ્વરની આવકાર ડ્રગ્સ કંપનીના માલિક અશ્વિનભાઈ નામની વ્યક્તિ હોવાની માહિતી સૂત્રોમાંથી મળી છે. કંપનીમાં જીવનરક્ષક દવાઓ બનાવવા માટે ઇન્ટરમીડિયેટ પ્રકારનાં કૅમિકલ બનાવવામાં આવતાં હતાં. દિલ્હીના ડ્રગ્સ કેસમાં ત્યાંથી મળેલું 518 કિલો કોકેન અંકલેશ્વરની આવકાર ડ્રગ્સ કંપનીમાં બન્યું હોવાનો ચોંકાવનારો ખુલાસો થયો હતો. દિલ્હીની કંપનીએ આવકાર કંપનીને તેમની જરૂરિયાત મુજબ કૅમિકલ બનાવી આપવાનો ઓર્ડર આપ્યો હતો. 518 કિલો કોકેન અંકલેશ્વરમાં ઓર્ડર આપી બનાવવામાં આવ્યું હોવાનું બહાર આવતાં કંપનીમાં વધુ ઓર્ડર હોવાની આશંકાએ રેડ કરવામાં આવી હતી.
કંપનીમાં તપાસ દરમિયાન દિલ્હી મોકલવા માટે ઓર્ડર પ્રમાણે અન્ય બેચ તૈયાર હોવાની શકયતાઓ જણાઇ રહી છે. આ બેચને પોલીસે કંપનીમાંથી જપ્ત કર્યો હોવાની સંભાવના જોવાઇ રહી છે. ડ્રગ્સ માફિયાઓ હવે નાની કંપનીઓમાં ઓર્ડર આપી માદક દ્રવ્યો બનાવડાવતા હોવાનું લાગી રહ્યું છે. દિવાળી તથા નવા વર્ષના તહેવારો આવી રહ્યા છે ત્યારે મહારાષ્ટ્ર, રાજસ્થાન અને મધ્યપ્રદેશ સુધી આ ડ્રગ્સ મોકલવાની માફિયાઓની તૈયારી હતી. અંકલેશ્વર ઇન્ડસ્ટ્રીયલ ઍસોસિયેશન પણ હવે જોબવર્કથી કૅમિકલ બનાવી આપતી કંપનીઓ સામે કાર્યવાહી કરવાની તૈયારીઓ કરી રહ્યું છે.
