Rajkot: જસદણ તાલુકાના ભાડલા ગામે રૂ. ૮૦ લાખ અને વિંછીયા ખાતે રૂ.૧ કરોડના ખર્ચે બનશે પશુ દવાખાનાનું નવું મકાન.
તા.૨૯/૧૧/૨૦૨૫
વાત્સલ્યમ્ સમાચાર
Rajkot: જસદણ અને વિંછીયા તાલુકામા પશુદવાખાનાઓ આવેલ છે, જે પૈકી જસદણ તાલુકાનુ મોટુ ગામ ભાડલા અને વિંછીયા તાલુકાનુ તાલુકા મથક વિંછીયા ગામે તમામ સુવિધાયુકત પશુદવાખાનાના નવા મકાન બાંધકામ માટેની મંજૂરી મળેલ છે.
રાજયના કેબિનેટ મંત્રી અમે આ વિસ્તારના કર્મઠ ધારાસભ્ય કુંવરજીભાઇ બાવળીયાની સતત જાગૃતતાથી અવિરત વિકાસના કામો જસદણ-વિંછીયા તાલુકામાં મંજૂર થઇ રહ્યા છે તેમાં વિશેષ વધારો થતા આ પશુદવાખાનાઓના સુવિધાયુકત નવા મકાન બાંધકામ અંગે રકમ ફાળવવામાં આવેલ છે. જેમાં ભાડલા ગામે નવા પશુદવાખાના મકાન બાંધકામ માટે ૮૦ લાખ અને વિંછીયા ગામે રૂા.૧ કરોડની ગ્રાન્ટ ફાળવાયેલ છે. આ અંગેની ટેન્ડર પ્રક્રિયા પૂર્ણ થયેલ છે અને ટુંક સમયમાં જ ભાડલા અને વિંછીયા ગામે પશુ દવાખાનાનું બાંધકામ શરુ થશે જેથી આસપાસના વિસ્તારના મોટાભાગના પશુપાલકોના પશુઓને સમયસર જરૂરી સારવાર-નિયમિત રસીકરણ તેમજ ટ્રીટમેન્ટ રૂમ, ઓપીડી રૂમ, દવા-સાધનોનો રૂમ અંગેની સારી સુવિધાઓ મળી શકશે. પશુપાલકોને દુધાળા પશુઓની સારસંભાળ, બિમારીઓની ઓળખ, દૂધ ઉત્પાદન વધારો વગેરે જેવા માર્ગદર્શન અંગેની શિબિરો માટે ઉપયોગી બનશે.
આ ઉપરાંત, જસદણ તાલુકાના કાર્યરત સાણથલી ગામે પશુ દવાખાનુ હોઇ નવુ પ્રાથમિક પશુ સારવાર કેન્દ્ર, ડોડીયાળા ગામ અને વિંછીયા તાલુકાના મોઢુકા ગામે પશુ દવાખાનુ હોઇ પીપરડી ગામે નવુ પ્રાથમિક પશુસારવાર કેન્દ્ર ચાલુ કરવાની મંજૂરી મળેલ છે. જેથી ગ્રામજનોને જરૂરી પશુસારવાર વિગેરે સુવિધાઓ માટે નજીકના અંતરે પશુ સારવાર કેન્દ્રો ખાતે ઉપલબ્ધ થશે.
