કિરીટ પટેલ બાયડ
બાયડમાં ગેસ સિલિન્ડરની અછત અને એજન્સીની લાલિયાવાડી
બાયડ: ગેસ એજન્સીના ધાંધિયાથી ગૃહિણીઓ પરેશાન; DAC નંબર છતાં બોટલ ન મળતા ‘કાળાબજાર’ની આશંકા
બાયડ શહેરમાં છેલ્લા કેટલાક સમયથી રાંધણ ગેસના સિલિન્ડર
મેળવવા માટે ગ્રાહકોને ભારે હાલાકીનો સામનો કરવો પડી રહ્યો છે. ગેસ એજન્સી દ્વારા ગ્રાહકોને ડિલિવરી ઓથેન્ટિકેશન કોડ (DAC) મોકલી આપવા છતાં દિવસો સુધી બોટલ આપવામાં આવતી નથી. એજન્સીના કર્મચારીઓના ઉદ્ધત વર્તન અને ઓફિસથી ગોડાઉન વચ્ચેના ધક્કાઓને કારણે સામાન્ય જનતામાં ભારે રોષ જોવા મળી રહ્યો છે.
ઓફિસ અને ગોડાઉન વચ્ચે ગ્રાહકો ફૂટબોલ બન્યા
સ્થાનિક ગ્રાહકોના જણાવ્યા અનુસાર, ગેસ બુકિંગ કરાવ્યા બાદ મોબાઈલ પર DAC નંબર આવી જાય છે, જેનો અર્થ એ થાય કે ગેસ સિલિન્ડર વિતરણ માટે તૈયાર છે. આમ છતાં, જ્યારે ગ્રાહકો ગેસ એજન્સીની ઓફિસે જાય છે, ત્યારે તેમને ગોડાઉન પર મોકલવામાં આવે છે અને ગોડાઉન પરના કર્મચારીઓ ‘સ્ટોક નથી’ અથવા ‘ગાડી હજુ આવી નથી’ તેવા બહાના હેઠળ ફરી ઓફિસ પર મોકલે છે. કર્મચારીઓની આ “ખો-ખો” ની રમતને કારણે મજૂરી છોડીને આવેલા શ્રમિકો અને ગૃહિણીઓ કલાકો સુધી હેરાન થઈ રહ્યા છે.
કાળાબજારની ચર્ચાઓએ જોર પકડ્યું
એક તરફ સામાન્ય ગ્રાહકોને હક્કનો બાટલો મેળવવા માટે ફાંફા મારવા પડે છે, બીજી તરફ બજારમાં ચર્ચાઓ જાગી છે કે એજન્સીના કેટલાક મળતિયા કર્મચારીઓ ગેસ સિલિન્ડરનું બારોબાર વેચાણ કરી રહ્યા છે.
ગ્રાહકોનો આક્ષેપ: રજિસ્ટર્ડ ગ્રાહકોને વંચિત રાખીને કથિત રીતે હોટલ-ઢાબા કે અન્ય વ્યાપારિક એકમોમાં ગેસ સિલિન્ડર કાળાબજારમાં પહોંચાડવામાં આવી રહ્યા છે.
લાંબા સમયથી ચાલી રહેલી આ સમસ્યા બાબતે તંત્ર દ્વારા હજુ સુધી કોઈ કડક તપાસ કરવામાં આવી નથી, જેના કારણે એજન્સીના સંચાલકો બેફામ બન્યા હોય તેવું લાગી રહ્યું છે.
”અમે ઓનલાઇન પેમેન્ટ અને બુકિંગ કરીએ છીએ, મેસેજ પણ આવી જાય છે, છતાં અહીં ધક્કા ખાવા પડે છે. ગેસ એજન્સીના કર્મચારીઓ ગ્રાહકો સાથે ગેરવર્તણૂક કરે છે. જો આ સમસ્યાનો વહેલી તકે ઉકેલ નહીં આવે તો અમે ઉચ્ચ કક્ષાએ રજૂઆત કરીશુ
મુખ્ય મુદ્દાઓ જે તંત્ર સામે સવાલ ઉભા કરે છે:
જો સ્ટોક નથી, તો ગ્રાહકોને DAC નંબર શા માટે જનરેટ કરી આપવામાં આવે છે?
એજન્સીના કર્મચારીઓ દ્વારા ગ્રાહકોને શા માટે ખોટી રીતે દોડાવવામાં આવે છે?
શું પુરવઠા વિભાગ આ કથિત કાળાબજારની તપાસ માટે ગોડાઉન પર ઓચિંતી તપાસ કરશે?
બાયડની જનતા હવે માંગ કરી રહી છે કે તંત્ર દ્વારા આ મામલે મધ્યસ્થી કરવામાં આવે અને ગેસ વિતરણ વ્યવસ્થા પારદર્શક બનાવવામાં આવે જેથી સામાન્ય માણસને હેરાનગતિમાંથી મુક્તિ મળે.
