તિબેટમાં મંગળવાર સવારે એક કલાકની અંદર જ ભૂકંપના 6 ઝટકા અનુભવાયા હતા જેમાં રિક્ટર સ્કેલ પર 7.1ની તીવ્રતાનો શક્તિશાળી ભૂકંપ પણ સામેલ છે. કેટલીક બિલ્ડિંગ સહિત ઇન્ફ્રાસ્ટ્રક્ચરને પણ મોટા પાયે નુકસાન થયું છે. ભારત, નેપાળ, બાંગ્લાદેશ અને ભૂટાનના કેટલાક વિસ્તારમાં પણ ભૂકંપના ઝટકા અનુભવાયા હતા. સિક્કિમ સહિત પૂર્વોત્તર ભારતના અન્ય રાજ્ય બિહાર અને પશ્ચિમ બંગાળ સહિત ઉત્તર ભારતના વિવિધ ભાગમાં ભૂકંપના ઝટકા અનુભવાયા હતા. નેપાળના પાટનગર કાઠમાંડુમાં પણ ભૂકંપના ઝટકા અનુભવાતા લોકો ઘરની બહાર આવી ગયા હતા.
તિબેટમાં વહેલી સવાર 6.35 વાગ્યાથી છેલ્લા છ કલાકમાં ભૂકંપના કુલ 14 આચંકાઓના કારણે ભારે તારાજી સર્જાઈ છે. 7.1 તીવ્રતાના ભૂકંપમાં અનેક ઈમારતો ધરાશાયી થઈ છે. આશરે ૧૦૦ થી વધુ લોકોના મોત નીપજ્યા છે અને 140થી વધુ લોકો ઘવાયા છે. બચાવ કામગીરી ચાલુ છે, મોતનો આંકડો સતત વધી રહ્યો છે.
ચીનના તિબેટમાં સતત ધરા ધ્રુજી રહી છે. વહેલી સવારે 5.41 વાગ્યે 4.2ની તીવ્રતાનો પહેલો ભૂકંપ આવ્યો હતો, બાદમાં બીજો ભૂકંપ 7.1 તીવ્રતાનો હતો. દર મિનિટે ભૂકંપના નાના-મોટા આચંકાઓ આવી રહ્યા છે. નેપાળના કાઠમાંડૂમાં પણ શક્તિશાળી ભૂકંપના આંચકાના કારણે લોકો ભયભીત બન્યા હતા. સવારે સાતથી આઠ વાગ્યા સુધીમાં જ ઓછામાં ઓછા છ વખત ભૂકંપના આંચકા આવ્યા હતા. નેપાળની સરહદ નજીક તિબેટમાં આવેલા આ ભૂકંપના આચંકા બિહાર, આસામ અને પશ્ચિમ બંગાળ સુધી અનુભવાયા હતા. ભૂકંપનું કેન્દ્ર બિંદુ તિબેટમાં ઝિઝાંગ પર હતું. ચીને પણ ભૂકંપના કારણે પોતાની બાજુ સ્થિત માઉન્ટ એવરેસ્ટ પર અવરજવર બંધ કરી છે.
વિશ્વભરમાં સૌથી વધુ ભૂકંપ અને ભયાનક ભૂકંપના આંચકા ચીનમાં આવ્યા છે. 1990થી 2024 દરમિયાન ચીનમાં કુલ 186 ભૂકંપ નોંધાયા હતા. જેમાં અંદાજે 10 લાખ ડોલરનું નુકસાન થયું છે. ઉપરોક્ત સમયગાળામાં ઈન્ડોનેશિયામાં 166, ઈરાનમાં 109 અને જાપાનમાં 98 ભૂકંપના આંચકા નોંધાયા છે. અમેરિકામાં 78 અને તુર્કેયમાં 62 જ્યારે ભારતમાં 58 ભૂકંપના આંચકા નોંધાયા છે.
