વાત્સલ્યમ્ સમાચાર.
રિપોર્ટ :- રમેશ મહેશ્વરી – મુન્દ્રા કચ્છ.
મુન્દ્રા,તા.11 જૂન : કચ્છ જિલ્લાના મુન્દ્રા શહેરી આરોગ્ય કેન્દ્રને મંજૂરી મળ્યાને એક વર્ષ જેટલો સમય વીતી ચૂક્યો છે. ગુજરાતની સંવેદનશીલ સરકારે નગરપાલિકા બન્યાના ટૂંક સમયમાં જ શહેરી આરોગ્ય કેન્દ્રની મંજૂરી આપી દીધી છે અને તેના માટે જરૂરી ગ્રાન્ટ પણ ફાળવી આપી છે. પરંતુ, આશ્ચર્યજનક રીતે, રાજ્ય સરકાર દ્વારા મંજૂર થયેલ આ શહેરી આરોગ્ય કેન્દ્ર હજુ સુધી કાર્યરત થઈ શક્યું નથી. સ્થાનિક નાગરિકોમાં આ બાબતે ભારે રોષ અને ચિંતા પ્રવર્તી રહી છે, ખાસ કરીને વર્તમાન કોરોનાની પરિસ્થિતિને જોતા આ આરોગ્ય કેન્દ્રની તાતી જરૂરિયાત અનુભવાઈ રહી છે.
પ્રાપ્ત સરકારી દસ્તાવેજો મુજબ, મુખ્ય જિલ્લા આરોગ્ય અધિકારી દ્વારા તા. ૧૪/૦૮/૨૦૨૪ ના રોજ તાલુકા હેલ્થ ઓફિસર, મુન્દ્રાને સ્પષ્ટપણે “નેશનલ હેલ્થ મિશન અંતર્ગત શહેરી પ્રા. આ. કેન્દ્ર કાર્યરત કરવા” સૂચના આપવામાં આવેલી હતી. એટલું જ નહીં, આ કેન્દ્ર માટે મેડિકલ ઓફિસરની નિમણુંક પણ તા. ૦૮/૧૨/૨૦૨૪ ના રોજ કરવામાં આવી હતી, જે દર્શાવે છે કે સરકાર દ્વારા માનવબળની પણ વ્યવસ્થા કરવામાં આવી હતી. જોકે, આ મેડિકલ ઓફિસર માત્ર બે મહિના સુધી સેવા આપી, ઉચ્ચ અભ્યાસની પરીક્ષા પાસ કરીને રાજીનામું આપીને ચાલ્યા ગયા. ત્યારબાદ છેલ્લા પાંચ માસથી આ જગ્યા ખાલી છે અને કેન્દ્ર શરૂ કરવા માટે કોઈ નક્કર પ્રયત્નો કરવામાં આવ્યા નથી.
આ વિલંબનું મુખ્ય કારણ સ્થાનિક સ્તરે, નગરપાલિકા અને આરોગ્યતંત્ર વચ્ચેના તાલમેલનો અભાવ તેમજ સ્થાનિક આગેવાનોની આવડત કે ઈચ્છાશક્તિનો અભાવ હોવાનું જણાઈ રહ્યું છે. આના પરિણામે રાજ્ય સરકારના આરોગ્ય વિભાગ દ્વારા મંજૂર કરવામાં આવેલ સેવા અને સુવિધાનો લાભ લેવામાં વિલંબ થઈ રહ્યો છે. જેના કારણે સ્થાનિક લોકોને સરકારી આરોગ્ય સેવાઓથી વંચિત રહેવું પડી રહ્યું છે અને ખાનગી દવાખાનાઓમાં મોંઘી સારવાર કરાવવાની ફરજ પડી રહી છે.
વર્તમાન સમયમાં જ્યારે ગુજરાત સહિત કચ્છમાં કોરોનાના કેસોમાં ફરીથી વધારો જોવા મળી રહ્યો છે, ત્યારે જો આ મંજૂર થયેલ શહેરી આરોગ્ય કેન્દ્રને તાત્કાલિક ધોરણે શરૂ કરવામાં આવે તો લોકોને ઘરઆંગણે પ્રાથમિક આરોગ્યલક્ષી સુવિધાઓ મળી શકે તેમ છે. આ માટે મહત્વપૂર્ણ છે કે નગરપાલિકા બન્યા અગાઉની મુન્દ્રા અને બારોઈ ગ્રામ પંચાયતોના હાલમાં ખાલી પડેલા મકાનો તેમજ ગ્રામ હાટની દસ ખાલી દુકાનો (જે સરકારશ્રીના હસ્તક છે) પૈકી કોઈ એક યોગ્ય બિલ્ડીંગમાં શહેરી આરોગ્ય કેન્દ્ર શરૂ કરી શકાય છે, જેનાથી ભાડાના મકાનની જરૂરિયાત પણ રહેશે નહીં અને તાત્કાલિક સેવાનો પ્રારંભ થઈ શકશે.
મુન્દ્રાના નાગરિકોની માંગ છે કે, મુખ્ય જિલ્લા આરોગ્ય અધિકારીશ્રી, જિલ્લા વિકાસ અધિકારીશ્રી અને સ્થાનિક ધારાસભ્યશ્રી આ બાબતે અંગત રસ દાખવે અને ઉપલબ્ધ સરકારી માળખાનો સદુપયોગ કરીને તાત્કાલિક અસરથી મુન્દ્રાના શહેરી આરોગ્ય કેન્દ્રને કાર્યરત કરવા માટે કાર્યવાહી કરે. સ્થાનિક જનપ્રતિનિધિઓ અને વહીવટી અધિકારીઓની સક્રિય ભૂમિકા જ આ સમસ્યાનું નિરાકરણ લાવી શકે છે. લોકો લાંબા સમયથી સરકારી આરોગ્ય સેવાઓથી વંચિત છે અને આ વિલંબને કારણે તેમને ભારે હાલાકીનો સામનો કરવો પડી રહ્યો છે.
જ્યાં સુધી આ કેન્દ્ર શરૂ ન થાય ત્યાં સુધી લોકોને મોંઘી દવાઓ અને સારવાર માટે ખાનગી હોસ્પિટલો પર નિર્ભર રહેવું પડશે, જે એક મોટો પ્રશ્ન છે. સ્થાનિક સંબંધિત અધિકારીઓ સમક્ષ તાત્કાલિક પગલાં લેવાની અપીલ પણ કરી રહ્યા છે.
