વાત્સલ્યમ્ સમાચાર,
પૂજા ઠક્કર – મુંદરા કચ્છ.
વૈશ્વિક મોંઘવારીના માર વચ્ચે મધ્યમ વર્ગની વહારે મોદી સરકાર: જુઓ રાંધણ ગેસના સ્થિર ભાવ પાછળનું સાચું આર્થિક ગણિત
૦૦૦
૨૦૦૪ વિરુદ્ધ ૨૦૨૬: ગેસ મોંઘો થયો કે સસ્તો? સમજો આવક અને ખરીદ શક્તિનું સાચું ગણિત
મુંદરા,તા.2:
આજે જ્યારે સમગ્ર વિશ્વ આર્થિક અસ્થિરતા અને મોંઘવારીના કપરા સમયમાંથી પસાર થઈ રહ્યું છે ત્યારે ભારતના મધ્યમ વર્ગીય પરિવારો, ગૃહિણીઓ અને શ્રમિકો માટે કેન્દ્ર સરકારનો એક નિર્ણય મોટી આર્થિક રાહત લઈને આવ્યો છે. આંતરરાષ્ટ્રીય બજારમાં પ્રતિકૂળ પરિસ્થિતિઓ હોવા છતાં ઘરેલુ રાંધણ ગેસ (14.2 કિલો)ના ભાવ સ્થિર રાખીને પ્રધાનમંત્રી નરેન્દ્ર મોદીની સરકારે સાબિત કર્યું છે કે તેમના શાસનના કેન્દ્રમાં હંમેશા સામાન્ય માણસ અને માનવીય અભિગમ જ હોય છે.
વૈશ્વિક પડકારો વચ્ચે સરકારની કુશળ વહીવટી વ્યુહરચના :
છેલ્લા કેટલાક સમયથી વૈશ્વિક સ્તરે એવા અનેક પરિબળો ઉભા થયા છે જેના કારણે એલ.પી.જી.ના ભાવમાં આખી દુનિયામાં જંગી વધારો થયો છે:
* કાચા તેલ (Crude Oil) ના ભાવમાં ઉછાળો: વૈશ્વિક બજારમાં ક્રૂડ અને ગેસના ભાવ સતત વધી રહ્યા છે.
* આંતરરાષ્ટ્રીય રાજકીય તણાવ: મધ્ય પૂર્વ (મીડલ ઈસ્ટ) ની કટોકટી અને રશિયા-યુક્રેન યુદ્ધના કારણે સપ્લાય ચેઈન ખોરવાઈ છે.
* આયાત ખર્ચમાં વધારો: યુએસ ડોલર સામે રૂપિયાના મૂલ્યમાં આવતા ઉતાર-ચઢાવને કારણે ગેસ આયાત કરવાનો ખર્ચ અને દરિયાઈ નૂર (શિપિંગ ભાડા) ખૂબ વધી ગયા છે.
આવા ભયંકર આંતરરાષ્ટ્રીય દબાણ વચ્ચે પણ સરકારે એક કુશળ આર્થિક વ્યુહરચના અપનાવી છે. સરકારે સામાન્ય નાગરિકના રસોડા પર આર્થિક બોજ નાખવાને બદલે તે નાણાકીય ભારણ ધંધાદારી હેતુ માટે કમાતા વાણિજ્યિક એકમો (કૉમર્શિઅલ સેક્ટર્સ) તરફ વાળી દીધું છે. આ જ કારણે 5 કિલો અને 19 કિલોના કમર્શિયલ સિલિન્ડરમાં ભાવફેરફાર થયો, પરંતુ ૧૪.૨ કિલોના ઘરેલુ વપરાશના રાંધણ ગેસમાં કોઈ જ વધારો ન કરીને સરકારે સામાન્ય પરિવારોના બજેટને સુરક્ષિત રાખ્યું છે.
૨૦૦૪ વિરુદ્ધ ૨૦૨૬: ગેસ મોંઘો થયો કે સસ્તો? સમજો આવક અને ખરીદ શક્તિનું સાચું ગણિત :
વિરોધ પક્ષો દ્વારા વારંવાર એક જ વાત પકડીને લોકોને ગેરમાર્ગે દોરવામાં આવે છે કે “૨૦૦૪માં ગેસ અંદાજે ₹૪૦૦ માં મળતો હતો, જે આજે ૨૦૨૬માં અંદાજે ₹૯૦૦ આસપાસ છે.” પરંતુ આ માત્ર નકારાત્મકતા ફેલાવતો ભ્રામક પ્રચાર છે. વાસ્તવિકતા સમજવા માટે સામાન્ય માણસ અને મધ્યમ વર્ગની આવકમાં થયેલા વધારા અને તેની ખરીદ શક્તિ (પરચેસિંગ પાવર)નું સાચું ગણિત સમજવું જરૂરી છે.
૧. શ્રમિક વર્ગનું દેશી ગણિત (મજૂરીના દિવસો):
* ૨૦૦૪: ૨૦૦૪માં એક અકુશળ શ્રમિકને દૈનિક માંડ ₹૧૦૦ મજૂરી મળતી હતી. તે સમયે ₹૪૦૦ નો ગેસ સિલિન્ડર ખરીદવા માટે તે શ્રમિકે પોતાના ૪ દિવસની આખી મજૂરીની આવક ખર્ચવી પડતી હતી.
* ૨૦૨૬: ૨૦૨૬માં સરકારના શ્રમ સુધારાઓ અને લઘુત્તમ વેતનની નવી જોગવાઈઓ મુજબ એક અકુશળ શ્રમિકનું લઘુત્તમ વેતન ₹૨૦,૩૫૮ માસિક (દૈનિક ₹૭૮૩) થઈ ગયું છે. આજના હિસાબે ₹૯૦૦ નો ગેસ ખરીદવા માટે શ્રમિકે લગભગ ૧ દિવસની મજૂરીની આવક જ ખર્ચવી પડે છે!
૨. મધ્યમ વર્ગ અને સરકારી કર્મચારીઓનું ગણિત:
આ જ વાસ્તવિકતા સરકારી અને સંગઠિત ક્ષેત્રના કર્મચારીઓને પણ એટલી જ લાગુ પડે છે. સામાન્ય રીતે નોકરિયાતોનો સાચો આંકડો લોકો સમક્ષ જાહેર થતો નથી પરંતુ હકીકત એ છે કે:
* ૨૦૦૪: ૨૦૦૪માં એક સામાન્ય વર્ગ-૩ ના સરકારી કર્મચારીનો માસિક પગાર અંદાજે ₹૪,૦૦૦ આસપાસ હતો. એટલે કે પોતાના એક મહિનાના પગારનો ૧૦મો ભાગ (૧૦%) તેમણે એક ગેસ સિલિન્ડર પાછળ ખર્ચવો પડતો હતો.
* ૨૦૨૬: વિવિધ પગાર પંચો અને ભથ્થાઓના વધારા સાથે આજે ૨૦૨૬માં એ જ વર્ગ-૩ ના કર્મચારીનો પગાર વધીને ₹૯૦,૦૦૦ થી પણ ઉપર પહોંચી ગયો છે! આજે ₹૯૦,૦૦૦ ના પગાર સામે ₹૯૦૦ નો ગેસ સિલિન્ડર એ તેમના માસિક પગારનો માત્ર ૧% (સોમો ભાગ) જ થાય છે!
આ આંકડાકીય વાસ્તવિકતા જ સાબિત કરે છે કે ૨૦૦૪ની સરખામણીએ આજે ગેસ પાછળ કરવો પડતો વાસ્તવિક આર્થિક બોજ ખૂબ જ ઘટ્યો છે. આ સ્થિતિમાં ગેસના ભાવ બાબતે હોબાળો મચાવવો કે રોદણા રોવા એ સહેજ પણ વ્યાજબી કે તાર્કિક નથી.
નિષ્કર્ષ: ભ્રામક પ્રચારથી દૂર રહીએ વાસ્તવિકતા સ્વીકારીએ:
નકારાત્મકતા ફેલાવનારા તત્વો માત્ર કિંમતના આંકડા બતાવીને લોકોને ઉશ્કેરે છે પરંતુ દેશના નાગરિકોની આવકમાં થયેલો ધરખમ વધારો અને વૈશ્વિક કટોકટી વચ્ચે પણ સરકારે કોમર્શિયલ ક્ષેત્ર પર ભારણ તબદીલ કરીને ઘરેલુ રાંધણ ગેસ માટે આપેલી મોટી રાહતો છુપાવે છે. ગૃહિણીઓ અને મધ્યમ વર્ગ પ્રત્યે હંમેશા સંવેદના દાખવતી વર્તમાન ભારત સરકાર આ લોકલક્ષી અને કુશળ આર્થિક અભિગમ માટે ખરેખર અભિનંદનને પાત્ર છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
