વાત્સલ્યમ્ સમાચાર,
પૂજા ઠક્કર – મુંદરા કચ્છ.
જૈન શાસનનો ૨૫૮૨મો સ્થાપના દિવસ: ભારતભરના જૈન સંઘો અને તીર્થોમાં સોમવારે થશે ભવ્ય ઉજવણી
ભગવાન મહાવીર સ્વામીએ સ્થાપેલા અહિંસા, સત્ય અને સંયમના માર્ગને જીવનમાં ઉતારવાનો પવિત્ર અવસર
મુંદરા, તા. 27:
જૈન ધર્મમાં જેનું અત્યંત ધાર્મિક અને ઐતિહાસિક મહત્વ છે તેવો ‘જિનશાસન સ્થાપના દિવસ’ આગામી સોમવાર, ૨૭ એપ્રિલ ૨૦૨૬ (વૈશાખ સુદ-૧૧) ના રોજ સમગ્ર ભારતભરના જૈન સંઘો અને તીર્થધામોમાં શ્રદ્ધાપૂર્વક ઉજવવામાં આવશે. ૨૫૮૧ વર્ષ પહેલાં આ પવિત્ર દિવસે પરમાત્મા મહાવીર સ્વામીએ જિનશાસનની પુનઃ સ્થાપના કરી હતી, જેના માનમાં ચાલુ વર્ષે ૨૫૮૨માં વર્ષનો મંગલ પ્રારંભ થશે.
આ અવસરે શાસન પ્રભાવક પૂજ્ય ગુરુભગવંતોના સાનિધ્યમાં વિવિધ ધાર્મિક કાર્યક્રમોનું આયોજન કરવામાં આવ્યું છે. જેમાં વહેલી સવારે શાસન ધ્વજ વંદન, ભવ્ય શોભાયાત્રા, પરમાત્માની વિશેષ આંગી, પૂજા-અનુષ્ઠાન અને પ્રવચન જેવા કાર્યક્રમો યોજાશે. આ મંગલ પ્રસંગે જીવદયા, અનુકંપાદાન અને સાધર્મિક ભક્તિ જેવા માનવતાવાદી કાર્યોને વિશેષ પ્રાધાન્ય આપવામાં આવશે.
મુનિશ્રી નયશેખર મહારાજ સાહેબનો સંદેશ:
માનવતાના મસીહા પ.પૂ.આ.ભ. શ્રીમદ્ વિજય રત્નશેખરસૂરીશ્વરજી મહારાજાના શિષ્યરત્ન પ.પૂ. મુનિરાજશ્રી નયશેખર મહારાજ સાહેબે આ દિવસનું મહત્વ સમજાવતા જણાવ્યું હતું કે “જૈન શાસન સ્થાપના દિવસ એ ક્ષણનું સ્મરણ કરાવે છે જ્યારે તીર્થંકર ભગવાને કેવળજ્ઞાન પ્રાપ્ત કર્યા બાદ સમવશરણમાં પ્રથમ દેશના આપી જગતને મુક્તિનો માર્ગ બતાવ્યો હતો. ભગવાને સાધુ, સાધ્વી, શ્રાવક અને શ્રાવિકા એમ ચતુર્વિધ સંઘની સ્થાપના કરી ધર્મના શાસનને જીવંત કર્યું હતું.”
વધુમાં તેઓશ્રીએ ઉમેર્યું હતું કે સાચું સુખ ભૌતિક સાધનોમાં નહીં પણ આત્માની શુદ્ધિમાં છે. આ દિવસે માત્ર મહોત્સવ જ નહીં પરંતુ અહિંસા, સત્ય અને અપરિગ્રહ જેવા મહાવ્રતોને જીવનમાં ઉતારવાનો દ્રઢ સંકલ્પ લેવો જોઈએ.
ઉજવણીના મુખ્ય આકર્ષણો:
* ધાર્મિક કાર્યક્રમો: મંદિરોમાં વિશેષ અભિષેક, આરાધના, સ્વાધ્યાય અને પ્રતિક્રમણ.
* માનવતાના કાર્યો: પક્ષીઓને ચણ, ગૌ-સેવા (જીવદયા) અને જરૂરિયાતમંદોને દાન.
* આધ્યાત્મિક પ્રેરણા: સમ્યક દર્શન, જ્ઞાન અને ચારિત્ર્યની પ્રાપ્તિ માટેના વિશેષ પ્રવચનો.
સમગ્ર ભારતભરના જૈન સમાજમાં આ દિવસને લઈને ભારે ઉત્સાહ જોવા મળી રહ્યો છે અને ઠેર-ઠેર જિનશાસનની જયઘોષ સાથે ધર્મની પ્રભાવના કરવામાં આવશે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
