MORBI:મોરબી ભાજપમાં ભડકો: જયંતિ રાજકોટિયાના નિવેદન સામે પાટીદાર આગેવાનો લાલઘૂમ, ‘પરચો’ બતાવવાની આપી ચીમકી
MORBI:મોરબી ભાજપમાં ભડકો: જયંતિ રાજકોટિયાના નિવેદન સામે પાટીદાર આગેવાનો લાલઘૂમ, ‘પરચો’ બતાવવાની આપી ચીમકી
મોરબી: નગરપાલિકાની ચૂંટણી પૂર્વે મોરબીના રાજકારણમાં ગરમાવો આવી ગયો છે. ખાસ કરીને વોર્ડ નંબર 09 ના ભાજપના ઉમેદવારની પસંદગીને લઈને ચાલી રહેલો વિવાદ હવે શમવાનું નામ નથી લઈ રહ્યો. આજે મોરબી જિલ્લા ભાજપ પ્રમુખ જયંતિ રાજકોટિયા અને પાટીદાર આગેવાન વિનુભાઈ અધારા સામસામે આવી જતાં રાજકીય માહોલ ગરમાયો છે.
જયંતિ રાજકોટિયાનું નિવેદન: “કોઈ વિવાદ નથી”આજે મીડિયા સાથેની વાતચીતમાં જિલ્લા ભાજપ પ્રમુખ જયંતિ રાજકોટિયાએ આક્રમક વલણ અપનાવતા જણાવ્યું હતું કે, “વોર્ડ નંબર 09 માં કોઈ જ વિવાદ નથી. માત્ર અમુક લોકો, જેઓ પક્ષમાંથી વ્યક્તિગત લાભ લેવા ઈચ્છે છે, તેઓ આખા પટેલ સમાજનું નામ આગળ ધરીને ખોટો વિવાદ ઊભો કરી રહ્યા છે.” તેમના આ નિવેદનથી નારાજગીની આગમાં ઘી હોમાયું છે.
વિનુભાઈ અધારાનો વળતો પ્રહાર: “હવે અસર તમામ વોર્ડમાં દેખાશે”રાજકોટિયાના આ નિવેદન સામે પાટીદાર આગેવાન વિનુભાઈ અધારાએ આકરા શબ્દોમાં વળતો જવાબ આપ્યો છે. તેમણે સ્પષ્ટ ચિમકી ઉચ્ચારતા જણાવ્યું કે:વિવાદ હવે વ્યાપક બનશે: “આ મામલો હવે માત્ર વોર્ડ નંબર 09 પૂરતો મર્યાદિત રહ્યો નથી. ભાજપ પ્રમુખના અહંકારી નિવેદન બાદ હવે આની અસર શહેરના તમામ વોર્ડમાં જોવા મળશે.”સમાજની તાકાત: વિનુભાઈએ ઉમેર્યું કે સમાજને બદનામ કરનારાઓને જનતા જ જવાબ આપશે.
પરિણામની ચેતવણી: “જોજો આગામી 28 તારીખે જ્યારે ચૂંટણીનું રિઝલ્ટ આવશે, ત્યારે ખબર પડશે કે જનતાનો મિજાજ શું છે.”
મુખ્ય મુદ્દો: વોર્ડ નંબર 09 ના ઉમેદવારના વિરોધથી શરૂ થયેલી આ લડાઈ હવે ‘વર્ચસ્વની જંગ’ બની ગઈ હોય તેમ લાગે છે. પાટીદાર આગેવાનોની આ ચીમકી આગામી ચૂંટણીમાં ભાજપ માટે મુશ્કેલી સર્જી શકે છે.
હવે જોવાનું એ રહેશે કે ભાજપ હાઈકમાન્ડ આ ડેમેજ કંટ્રોલ કરવા માટે કેવા પગલાં ભરે છે કે પછી 28 તારીખે મોરબીના રાજકારણમાં કોઈ મોટો ઉલટફેર જોવા મળે છે.
