વિજાપુર ફુદેડા ગામમાં રહી ગયેલા વિસ્તારોમાં રોડ–સ્વચ્છતા સમસ્યાઓ ઉકેલવા ગ્રામજનોની માંગ
વાત્સલ્યમ સમાચાર
સૈયદજી બુખારી વિજાપુર
વિજાપુર તાલુકાના ફુદેડા ગામના વિકાસ ના કામો માં રહી ગયેલા વિસ્તારો માર્ગ અને સ્વચ્છતા સંબંધિત સમસ્યાઓ નો સત્વરે ઉકેલ લાવવા માટે ગ્રામજનો દ્વારા તાલુકા વિકાસ અધિકારી ગોવિંદભાઈ ચૌધરી સમક્ષ રજૂઆત કરવામાં આવી છે. કેટલીક શેરી–ગલીઓમાં પેવરબ્લોક કે ઇન્ટરલોકિંગ રોડ ન હોવાથી વરસાદમાં કાદવ–કીચડ અને ઉનાળે ધૂળની સમસ્યા ઊભી થાય છે. વાહનવ્યવહાર મુશ્કેલ બનતા મહિલાઓ, વૃદ્ધો અને બાળકોને પણ ભારે તકલીફનો સામનો કરવો પડે છે. સ્થાનિકોએ આ વિસ્તારોમાં પ્રાથમિકતાથી ઇન્ટરલોકિંગ પેવરબ્લોક રોડ નાખવાની માંગણી કરી છે.
સ્વચ્છતા મુદ્દે પણ કેટલીક વિસ્તારોમાં જરૂરી સુવિધાઓ ન હોવાનું ગ્રામજનોએ જણાવ્યું હતું. સૂકો–ભીનો કચરો અલગ પાડવા બ્લુ–ગ્રીન ડસ્ટબિન, પ્લાસ્ટિક સેગ્રીગેશન શેડ તેમજ ઘરવખરી કચરા માટેની વ્યવસ્થાનો અભાવના કારણે લોકોને મુશ્કેલી પડી રહી છે. સ્વચ્છ ભારત મિશન (ગ્રામીણ) કે અન્ય યોજનામાંથી આ સુવિધાઓ તાત્કાલિક ઊભી કરવામાં આવે તેવી રજૂઆત કરવામાં આવી છે.આ અંગે તલાટી હર્ષ ભાઈ પટેલ દ્વારા માહિતી આપવામાં આવી કે ગામમાં છેલ્લા ત્રણ મહિનાથી અનેક વિકાસ કાર્યો ચાલી રહ્યા છે. સેવા સહકારી મંડળીથી રામપુર કોટ રોડ, માનસુરી રફીકભાઈના ઘરથી વાલ્મિકી નરસિંહભાઈ તરફનું સી.સી. રોડ, તળાવ ફરમાં પુર સંરક્ષણ દિવાલ, અમૃતભાઈ પટેલના ઘરથી સહકારી મંડળી સુધીની ગટર લાઇન, જૈન દેરાસર નજીકનો રોડ તથા જૂના ગામમાં ગરનાળા જેવા અનેક કામો હાથ ધરાયા છે. નવીન RO પ્લાન્ટનું કામ પણ પૂરું થવા આવ્યું છે. છતાં અમુક વિસ્તારોમાં બાકી રહેલા પેવરબ્લોક રોડ અને સ્વચ્છતા સુવિધાઓ તાત્કાલિક શરૂ કરવા ગ્રામજનોએ ફરી માંગણી કરી છે.
