Rajkot: રાજકોટ જિલ્લાના સ્પર્ધકો-કલાવૃંદો ૨૦ જુલાઈ સુધી કલા મહાકુંભ સ્પર્ધા માટે અરજી કરી શકશે
તા.૩૦/૬/૨૦૨૫
વાત્સલ્યમ્ સમાચાર
Rajkot: રાજકોટ જિલ્લા યુવા અને સાંસ્કૃતિક પ્રવૃત્તિઓની કચેરી દ્વારા “કલા મહાકુંભ ૨૦૨૫-‘૨૬”નું આયોજન કરવામાં આવી રહ્યું છે. આ કલા મહાકુંભમાં ૦૬થી ૧૪ વર્ષ, ૧૫થી ૨૦ વર્ષ, ૨૧થી ૫૯ વર્ષ તથા ૬૦ વર્ષથી ઉપર એમ કુલ ૦૪(ચાર) વય જુથનાં સ્પર્ધકો ભાગ લઈ શકશે. સ્પર્ધકની ઉંમર તા.૩૧/૧૨/૨૦૨૫ની સ્થિતિએ ગણવાની રહેશે. સ્પર્ધા તાલુકા/ઝોનકક્ષાથી જિલ્લાકક્ષા, પ્રદેશકક્ષા, અને રાજયકક્ષા એમ ક્રમશ: યોજવામાં આવશે.
કલા મહાકુંભ સ્પર્ધામાં વક્તૃત્વ, નિબંધ લેખન, કાવ્ય લેખન, ગઝલ શાયરી, લોકવાર્તા, દુહા-છંદ-ચોપાઇ, ચિત્રકલા, સર્જનાત્મક કારીગરી, લોકનૃત્ય, રાસ, ગરબા, ભરતનાટ્યમ, કથ્થક, કુચિપુડી, ઓડેસી, મોહીનીઅટ્ટમ, શાસ્ત્રીય કંઠ્ય સંગીત (હિન્દુસ્તાની), સુગમ સંગીત, લગ્ન ગીત, સમૂહ ગીત, લોકગીત/ભજન, હાર્મોનિયમ (હળવું), તબલા, ઓરગન, સ્કુલ બેન્ડ, વાંસળી, સિતાર, ગિટાર, સરોદ, સારંગી, પખવાજ, વાયોલીન, મૃદંગમ, રાવણ હથ્થો, જોડિયા પાવા, એક પાત્રીય અભિનય, ભવાઇ સહિત ૩૭ કૃતિઓનું આયોજન કરવામાં આવશે.
કલા મહાકુંભમાં રાજકોટ શહેર અને ગ્રામ્યનાં ભાગ લેવા ઈચ્છુક સ્પર્ધકોએ નિયત નમુનાના અરજીફોર્મમાં પોતાની સંપૂર્ણ વિગત ભરી આધારકાર્ડ અને બેંક પાસબુકનાં પ્રથમ પાનાની ઝેરોક્ષ નકલ સાથે “પ્રતિ, જિલ્લા યુવા વિકાસ અધિકારીશ્રી, જિલ્લા યુવા અને સાંસ્કૃતિક પ્રવૃત્તિઓની કચેરી,૫/૫, બહુમાળી ભવન, રેસકોર્ષ રોડ, રાજકોટ” ખાતે તા.૨૦/૦૭/૨૦૨૫નાં રોજ બપોરે ૧૨:૦૦ કલાક સુધીમાં રૂબરૂ અથવા ટપાલથી મોકલી આપવાનું રહેશે. નિયત સમય મર્યાદા બાદ આવેલી અરજીઓ ધ્યાને લેવામાં આવશે નહી, તેમ રાજકોટ જિલ્લા યુવા વિકાસ અધિકારીશ્રી એચ.વી.દિહોરાની યાદીમાં જણાવાયું છે.
