વાત્સલ્યમ સમાચાર પ્રવિણભાઇ ચૌહાણ વાવ થરાદ
વાવ-થરાદ જિલ્લામાં આવેલ ભોરોલ જિલ્લા પંચાયત સીટ પર રાજકીય ગરમાવો ચરમસીમાએ પહોંચ્યો છે. ચૂંટણી પૂર્વે જ અહીં રાજકીય સમીકરણોમાં મોટો ફેરફાર જોવા મળી રહ્યો છે. કોંગ્રેસે ભાજપને હરાવવા માટે હવે નવી રણનીતિ અપનાવી છે અને અપક્ષ ઉમેદવારને ખુલ્લેઆમ સમર્થન આપવાનો નિર્ણય કર્યો છે.
મળતી માહિતી મુજબ, કોંગ્રેસમાંથી ભાજપમાં જોડાયેલા જોગાજી રાજપૂત સામે મજબૂત ટક્કર આપવા માટે કોંગ્રેસે અપક્ષ ઉમેદવાર સેંધાભાઈ ઠાકોરને સમર્થન આપ્યું છે. સ્થાનિક સ્તરે કોંગ્રેસના કાર્યકર્તાઓને પણ અપક્ષ ઉમેદવારને જીતાડવા માટે સક્રિય થવા સૂચના આપવામાં આવી છે.
કોંગ્રેસના આ પગલાથી ભોરોલ સીટ પર ચૂંટણી વધુ રસપ્રદ બની ગઈ છે. રાજકીય વિશ્લેષકો માને છે કે વિરોધી મત એકત્ર કરવા માટે કોંગ્રેસનો આ પ્રયાસ ભાજપ માટે પડકારરૂપ બની શકે છે. બીજી તરફ, ભાજપ પણ પોતાની જીત માટે તમામ શક્તિ લગાવી રહી છે, જેના કારણે ભોરોલમાં ત્રિકોણીય નહીં પરંતુ સીધી ટક્કર જેવી સ્થિતિ સર્જાઈ છે.
હવે જોવાનું રહ્યું કે કોંગ્રેસનું આ સમર્થન અપક્ષ ઉમેદવાર માટે કેટલું ફળદાયી સાબિત થાય છે અને ભાજપ આ પડકારનો કેવી રીતે સામનો કરે છે. ભોરોલની આ સીટ પર પરિણામો શું આવે છે તે પર સમગ્ર જિલ્લામાં નજર જામી છે.
