Rajkot: રાજકોટમાં ત્રિદિવસીય રાજ્યકક્ષાની જવાહરલાલ નહેરુ સબ જુનિયર હોકી સ્પર્ધા
તા.૧૮/૯/૨૦૨૪
વાત્સલ્યમ્ સમાચાર
અંડર-૧૫ બોયઝની ૨૫ જિલ્લાની ટીમો વચ્ચે મુકાબલો – ૪૦૦ થી વધુ બાળ ખેલાડીઓ પ્રતિભા દર્શાવશે
૨૦ સપ્ટેમ્બર થી અંડર – ૧૭ મહિલા હોકી સ્પર્ધા યોજાશે
Rajkot: સ્પોર્ટ્સ ઓથોરિટી ઓફ ગુજરાત, ગાંધીનગર આયોજિત જિલ્લા રમતગમત અધિકારી, રાજકોટ સંચાલિત તથા હોકી રાજકોટના સંયુક્ત ઉપક્રમે રાજકોટના રેસકોર્સ સ્થિત મેજર ધ્યાનચંદ હોકી એસ્ટ્રોટર્ફ ગ્રાઉન્ડ ખાતે રાજ્યકક્ષાની જવાહરલાલ નહેરુ સબ જુનિયર હોકી સ્પર્ધાનો ગત રોજ પ્રારંભ થયો છે.
ત્રણ દિવસ ચાલનારી ઇન્ટર ડીસ્ટ્રીકટ સ્પર્ધામાં રાજયભરના ૨૫ જિલ્લાઓની શાળાઓની ટીમો ભાગ લઈ રહી છે. જેમાં ૪૦૦ થી વધુ કિશોર ભાગ લઈ રહ્યા હોવાનું સ્પર્ધાના કન્વીનર અને રાજકોટ હોકી કોચ શ્રી મહેશ દિવેચાએ જણાવ્યું છે.
સમગ્ર રાજ્યમાંથી જિલ્લા શાળાકીય સ્પર્ધામાં વિજેતા ટીમો વચ્ચે રાજકોટ ખાતે રાજ્ય કક્ષાનો મુકાબલો થવા જઈ રહ્યો છે. જેમાં આજે ક્વાર્ટર ફાઈનલ તેમજ સેમી ફાઈનલ મેચ રમવામાં આવી રહી છે. આવતીકાલ તા. ૧૯ સપ્ટેમ્બરના રોજ ફાઈનલ મેચ રમવામાં આવશે. જેમાં વિજેતા ટીમ નેશનલ લેવલે દિલ્હી ખાતે ભાગ લેશે. આ સ્પર્ધા પૂર્ણ થયા બાદ આગામી તા. ૨૦ સપ્ટેમ્બર થી અંડર -૧૭ મહિલા હોકી સ્પર્ધા યોજાશે.
અત્રે ઉલ્લેખનીય છે કે, તમામ ખેલાડીઓને સ્પોર્ટ્સ હોસ્ટલ ખાતે ઉતારો આપવામાં આવ્યો છે. અહીં તેઓને ભોજન તેમજ અન્ય જરૂરી સુવિધાઓ રમતગમત વિભાગ દ્વારા કરવામાં આવેલી છે.
