વાત્સલ્યમ્ સમાચાર.
રિપોર્ટ :- રમેશ મહેશ્વરી – બિમલભાઈ માંકડ – ભુજ કચ્છ.
સાંસદ ખેલ મહોત્સવમાં ભાગ લઈને મોટી સંખ્યામાં રજિસ્ટ્રેશન કરાવવા સાંસદ વિનોદભાઈ ચાવડાનો અનુરોધ.
ખેલ મહાકુંભ-૨૦૨૫ના રજિસ્ટ્રેશનનો મહાનુભાવોની ઉપસ્થિતિમાં શુભારંભ
ભુજ,તા-૨૯ ઓગસ્ટ : રમત ગમત, યુવા અને સાંસ્કૃતિક વિભાગ દ્વારા “નેશનલ સ્પોર્ટસ ડે” કાર્યક્રમની ઉજવણી અંતર્ગત તા. ૨૯ થી ૩૧ ઓગસ્ટ દરમિયાન વિવિધ પ્રવૃતિઓનું આયોજન કરવામાં આવ્યું છે. જે અન્વયે આજરોજ ૨૯ ઓગસ્ટના રોજ કચ્છના જિલ્લાકક્ષાના નેશનલ સ્પોર્ટસ ડેની ઉજવણી આર.ડી.વરસાણી હાઈસ્કૂલ ભુજ ખાતે કચ્છ મોરબી સાંસદ વિનોદભાઈ ચાવડાના અધ્યક્ષસ્થાને આયોજિત કાર્યક્રમમાં કરવામાં આવી હતી. સાંસદ વિનોદભાઈ ચાવડા, ધારાસભ્ય કેશુભાઈ પટેલ, ભુજ નગરપાલિકા પ્રમુખ રશ્મિબેન સોલંકી સહિત મહાનુભાવોએ ‘ખેલ મહાકુંભ – ૨૦૨૫’ રજિસ્ટ્રેશનનો પ્રારંભ કરાવ્યો હતો અને કચ્છના રમતવીરોને મહત્તમ સંખ્યામાં ભાગ લેવા અનુરોધ કર્યો હતો.સાંસદ વિનોદભાઈ ચાવડાએ આ પ્રસંગે જણાવ્યું હતું કે, આજે દેશમાં મહાન ખેલાડી મેજર ધ્યાનચંદના જન્મદિન નિમિત્તે નેશનલ સ્પોર્ટસ ડેની ઉજવણી કરવામાં આવી રહી છે. મેજર ધ્યાનચંદને શ્રદ્ધાંજલિ અર્પણ કરીને સાંસદ એ ઉમેર્યું હતું કે, આજના દિવસે કચ્છની તમામ શાળા-કોલેજોમાં રમત-ગમતના વિવિધ કાર્યક્રમોનું આયોજન કરવામાં આવ્યું છે. વડાપ્રધાન નરેન્દ્રભાઈ મોદીના દિશાદર્શનમાં રમત-ગમત ક્ષેત્રમાં આંતરરાષ્ટ્રીય કક્ષાની માળખાકીય સુવિધાઓ સરકારે ઊભી કરી છે તેમ જણાવીને સાંસદ એ વિદ્યાર્થીઓને રમત-ગમત ક્ષેત્રે આગળ આવીને દેશનું નામ રોશન કરવા અપીલ કરી હતી. આપણા દેશમાંથી અનેક રમતવીરો આંતરરાષ્ટ્રીયકક્ષાએ આયોજિત વિવિધ રમતોમાં ભાગ લઈને નામના મેળવી રહ્યા હોય, સાંસદ એ ગ્રામીણથી લઈને શહેર સુધીના તમામ બાળકોને રમત-ગમતમાં ઋચિ દાખવવા જણાવ્યું હતું. આ ઉપરાંત, સાંસદ વિનોદભાઈ ચાવડાએ વડાપ્રધાન ની પ્રેરણાથી અને ભારતના ગ્રામીણ વિસ્તારોમાંથી ખેલ પ્રતિભાઓને ઉજાગર કરવા માટે ‘સાંસદ ખેલ મહોત્સવ’ના રજિસ્ટ્રેશનનો પ્રારંભ કરાવ્યો હતો. ૨૯ ઓગસ્ટથી લઈને ૨૦ સપ્ટેમ્બર સુધી રમતવીરો મોટી સંખ્યામાં https://sansadkhelmahotsav.in/ વેબસાઈટ પર જઈને સાંસદ ખેલ મહોત્સવમાં રજિસ્ટ્રેશન કરાવે તેમ સાંસદ એ અનુરોધ કર્યો હતો. ભુજના ધારાસભ્ય કેશુભાઈ પટેલે આ પ્રસંગે જણાવ્યું હતું કે, રમત-ગમત ક્ષેત્રમાં સરકાર દ્વારા ખેલાડીઓને પ્રોત્સાહિત કરવામાં આવી રહ્યા છે. ધારાસભ્યશ્રીએ ખેલકૂદમાં મહારત હાંસલ કરીને રાષ્ટ્રનું ગૌરવ વધારવા અનુરોધ કર્યો હતો. રમત-ગમત માટે વડાપ્રધાન ના વિઝનનો ઉલ્લેખ કરીને ધારાસભ્યએ પસંદગીની રમતોમાં ઉત્સાહભેર ભાગ લેવા જણાવ્યું હતું. કચ્છ કલેક્ટરશ્રી આનંદ પટેલે નેશનલ સ્પોર્ટસ ડેની શુભેચ્છાઓ પાઠવીને મેજર ધ્યાનચંદના રમત-ગમત ક્ષેત્રના પ્રસંગોને વિદ્યાર્થીઓ સમક્ષ વાગોળ્યા હતા. મેજર ધ્યાનચંદ એ હોકીમાં ભારતને અપાવેલા ગૌરવને કલેક્ટર એ યાદ કરીને વિદ્યાર્થીઓને રમત-ગમત ક્ષેત્રે આગળ વધવા પ્રેરણા આપી હતી. કલેક્ટર એ વધુમાં જણાવ્યું હતું કે, ભારત આજે આંતરરાષ્ટ્રીય રમતો જેવી કે ઓલમ્પિક અને કોમનવેલ્થ માટે બીડ કરી રહ્યું છે ત્યારે સરકારની રમત-ગમત ક્ષેત્રની સુવિધાઓનો લાભ લઈને આપણે આગળ આવવું જોઈએ. આ ઉજવણી દરમિયાન મહાનુભાવોની ઉપસ્થિતિમાં ખેલ મહાકુંભ -૨૦૨૫ના રજિસ્ટ્રેશનનો પ્રારંભ કરાવવામાં આવ્યો હતો. સાંસદશ્રી સહિત મહાનુભાવોએ મેદાન પર જઈને રસ્સાખેંચ, લાંબી કૂદ, દોડ અને કબડ્ડી જેવી સ્પર્ધાઓનો પ્રારંભ કરાવીને ખેલાડીઓને પ્રોત્સાહિત કર્યા હતા. કાર્યક્રમ દરમિયાન ફીટ ઈન્ડિયાના શપથ મહાનુભાવો સહિત વિદ્યાર્થીઓએ લીધા હતા.આ પ્રસંગે કચ્છ મોરબી સાંસદ વિનોદભાઈ ચાવડા, ધારાસભ્ય કેશુભાઈ પટેલ, ભુજ નગરપાલિકા પ્રમુખ રશ્મિબેન સોલંકી, ભુજ તાલુકા પંચાયતના પ્રમુખ વિનોદભાઈ વરસાણી, કચ્છ કલેક્ટર આનંદ પટેલ, નિવાસી અધિક કલેક્ટર ડી.પી.ચૌહાણ, ભુજ પ્રાંત અધિકારી ડૉ. અનીલ જાદવ, જિલ્લા શિક્ષણાધિકારી સંજય પરમાર, જિલ્લા પ્રાથમિક શિક્ષણાધિકારી ભૂપેન્દ્ર વાઘેલા, ભુજ શહેર મામલતદાર તેજસ પટેલ, જિલ્લા રમત-ગમત અધિકારી મુકેશ ઘોયા, જિલ્લા રમત વિકાસ અધિકારી સુશ્રી જ્યોતિ ઠાકુર, આગેવાન રામજીભાઈ અને વસંતભાઈ સહિત આર.ડી.વરસાણી હાઈસ્કૂલના વિદ્યાર્થીઓ તેમજ વિવિધ શાળાઓના વિદ્યાર્થીઓ મોટી સંખ્યામાં ઉપસ્થિત રહ્યા હતા.
