પ્રેમલગ્ન મા સાક્ષી તરીકે સહી કરનાર યુવકને પીગળી ગામેથી અપહરણ કરી માર મારી ઝાડ સાથે બાંધી દઈ ધમકીઓ આપનાર 5 સામે ફરીયાદ.
તારીખ ૧૭/૧૧/૨૦૨૫
સાજીદ વાઘેલા કાલોલ
હાલોલના કાશીપુરા ગામે રહેતા સતીષભાઈ ચંદુભાઈ પરમારે નોંધાવેલ ફરીયાદની વિગત જોતા તેઓના કુટુંબી વિનોદભાઈ રયજીભાઈ પરમાર ને ત્રિકમપુરા તા.હાલોલની 19 વર્ષીય યુવતી હેતલ રાકેશ પરમાર સાથે તા ૧૫/૦૯/૨૫ ના રોજ લવ મેરેજ કર્યા હોય અને ફરીયાદી સતીષભાઈ ચંદુભાઈ પરમારે તેમા સાક્ષી તરીકે સહી કરી હોય અને વિનોદભાઈ પરમારને તા ૧૩/૧૧ ના રોજ હેતલબેન સાથે ક્યાંક જવાના હોય ફરિયાદી પોતાની મોટરસાયકલ પર હાલોલ સુધી મુકવા આવેલ ત્યારબાદ છોકરી પક્ષના માણસોને પોતે સહી કરી તથા હાલોલ સુધી મુકવા આવ્યા હોવાની જાણ થઈ હતી. છોકરી પક્ષના લોકો ઘરે તપાસમાં આવતા હોય વિનોદભાઈ ની માતાના પિયર કાલોલ તાલુકાના પીંગળી ગામે ફરિયાદી તથા વિનોદભાઈના કુટુંબીઓ આવી ગયા હતા જ્યાંથી ફરિયાદી પોતાની મોટરસાયકલ લઈને દુકાનથી ઘરે જતા હતા ત્યારે બે મોટરસાયકલ પર ત્રિકમપુરા ગામના (૧) નીલેશભાઈ રણછોડભાઈ પરમાર (૨) જીગરભાઇ હસમુખભાઇ પરમાર (૩) સુનિલભાઈ રાવજીભાઈ પરમાર (૪) ઇન્દ્રજિત ઉર્ફે મોન્ટુ અરવિંદભાઈ પરમાર (૫) અનિલભાઈ દશરથભાઈ પરમાર આવ્યા હતા અને ફરિયાદીને ગાળો બોલી પકડી પાડી ગડદા પાટુ નો માર મારી,”તુ અમારી છોકરીને પરત નહી અપાવુ તો તને મારી નાંખીશું તેવી ધમકી આપી મોટરસાયકલ પર બેસાડી મોટરસાયકલ સુનીલ હંકારતો હતો અને ફરીયાદી યુવકને વચ્ચે બેસાડી પાછળ નિલેશ રણછોડભાઈ બેસી ફરિયાદીને પકડી રાખ્યો હતો અને મોટરસાયકલ ઉપર અપહરણ કરી ખોડિયારપુરા લઈ ગયા હતા અને ત્યા ઉતારી પાચેવે ઘોલઘાપટ કરી ત્યાંથી મલાવ ચોકડી પાસે નદી બાજુ લઈ ગયેલ ત્યા પણ પાંચેવ જણાએ ગડદા પાટુ નો માર મારી,”તુ સાચુ બોલ આ ભાગી ગયેલ છોકરો અને છોકરી ની તને જાણ છે તે કયા છે તે બતાવ ” તેમ કહી ત્યાંથી ત્રિકમપુરા ગામે છોકરીના ઘરે લઈ ગયા હતા ત્યાં લીમડાના ઝાડ સાથે દોરડા વડે બાંધી દીધા હતા આ બાબતે ફરિયાદીના કાકી કિરણબેનને 112 ને ફોન કરતા પોલીસ ઘટના સ્થળે દોડી આવી હતી ત્યારે પાંચેવ જણા ફરિયાદીને છોડી દઈને ત્યાંથી ભાગી ગયા હતા સમગ્ર ઘટના બાબતે કાલોલ પોલીસ મથકે ફરીયાદ નોંધાવતા પોલીસે બીએનએસ કલમ ૧૩૭(૨), ૧૧૫(૨), ૩૫૨, ૩૫૧(૧), ૧૨૭(૨),૧૨૬(૨),૫૪ મુજબની ફરીયાદ નોંધી આગળની તપાસ હાથ ધરી છે.
