વાત્સલ્યમ સમાચાર
મદન વૈષ્ણવ
“બાળ લગ્ન મુક્ત ભારત અભિયાન” અંતર્ગત બાળ લગ્ન જેવી ગંભીર સામાજિક દુષણને પૂર્ણ રીતે નાબૂદ કરવાની દિશામાં મહત્વનો સંકલ્પ લેવામાં આવ્યો છે. ૨૭ નવેમ્બર ૨૦૨૪ ના રોજ શરૂ થયેલ આ અભિયાનનો મુખ્ય ઉદ્દેશ ૨૦૩૦ સુધી દેશમાં બાળકોને સુરક્ષિત, શિક્ષિત અને સશક્ત બનાવી એક સુખાકારી સમાજનું નિર્માણ કરવાનો છે.
આ અભિયાન હેઠળ તાલુકા તથા ગામ સ્તરે વિવિધ મંચો, શાળાઓ, આંગણવાડી અને સ્થાનિક સંસ્થાઓ દ્વારા બાળ લગ્ન મુક્ત શપથનો પ્રચાર-પ્રસાર, જનજાગૃતિ તથા કાનૂની માહિતી પ્રદાન કરીને લોકોને જાગૃત કરવામાં આવી રહ્યા છે . માતા-પિતા તથા યુવાધનને ખાસ સંદેશ આપવામાં આવ્યો છે કે સમાજના દરેક બાળકના શૈક્ષણિક તથા શારીરિક-માનસિક વિકાસ માટે બાલ લગ્ન સંપૂર્ણ રીતે અયોગ્ય છે અને તેને રોકવું દરેક નાગરિકની સામૂહિક જવાબદારી છે.
બાળ લગ્ન મુક્ત પ્રતિજ્ઞામાં જણાવાયું છે કે બાલ લગ્ન એક ગંભીર સામાજિક દુષણ છે જે બાળકના શિક્ષણ, આરોગ્ય અને ભવિષ્યને નષ્ટ કરે છે. તેથી દરેક નાગરીકે પોતાનાં ગામ, સમુદાય અને પરિવારમાં આ મુદ્દે કડક અભિગમ અપનાવી બાલ લગ્નની વિરુદ્ધમાં સજાગ રહેવાનું છે. કોઈપણ સ્થળે અથવા પરિસ્થિતિમાં બાળ લગ્નની શક્યતા જણાય તો તાત્કાલિક રીતે સંબંધિત તંત્રને જાણ કરવાની અપીલ કરવામાં આવી છે.
બાળલગ્ન પ્રતિબંધ અધિનિયમ-૨૦૦૬ મુજબ છોકરીની ઉંમર ૧૮ વર્ષ અને છોકરાની ૨૧ વર્ષ નિર્ધારિત છે. જિલ્લા પ્રશાસન દ્વારા સ્પષ્ટ કરવામાં આવ્યું છે કે બાલ લગ્ન કરાવનાર, સહકાર આપનાર વ્યક્તિ કાનૂની જવાબદારી હેઠળ આવશે અને ૨ વર્ષની સખત સજા અથવા ૧ લાખ સુધી દંડ થઈ શકે છે . દરેક નાગરિકને વિનંતી કરવામાં આવી છે કે આવા કોઈ પણ બનાવની માહિતી તાત્કાલિક જિલ્લા વહીવટી તંત્રને આપીને બાળકને અપ્રતિમ નુકસાનથી બચાવવામાં સહકાર આપવો.
જિલ્લા બાલ સુરક્ષા એકમ તેમજ બાળલગ્ન પ્રતિબંધ અધિકારીઓના સંપર્ક નંબર પણ જાહેર કરવામાં આવ્યા છે ચાઈલ્ડ લાઈન માટે ૧૦૯૮ , પોલીસ ૧૦૦ , મહિલા અભયમ ૧૮૧, બાળલગ્ન પ્રતિબંધક અધિકારી સહ સમાજ સુરક્ષા અધિકારીની કચેરી ૦૨૬૩૭ -૨૩૨૪૪૦ અને જિલ્લા બાળ સુરક્ષા એકમ ૦૨૬૩૭-૨૮૧૪૪૦ પર સંપર્ક કરવાનું જણાવેલ છે .
બાળ લગ્નમુક્ત સમાજનું સ્વપ્ન સાકાર કરવા માટે જિલ્લા તંત્ર, સમાજ સંસ્થાઓ અને નાગરિકો વચ્ચેની આ સામૂહિક પ્રતિબદ્ધતા નવસારી જિલ્લામાં સુરક્ષિત અને સશક્ત નવી પેઢીનું પાયો પૂરો પાડશે.
