બોરુની રીફાઈ સ્કૂલની સિદ્ધિ: પ્રથમ જ પ્રયાસે HSCમાં 95% પરિણામ, સંચાલકો એ શિક્ષકો-વાલીઓને બિરદાવ્યા.
તારીખ ૧૩/૦૫/૨૦૨૬
સાજીદ વાઘેલા કાલોલ
કાલોલ તાલુકાના બોરુ ગામ ખાતે આવેલી રીફાઈ પબ્લિક સ્કૂલે ધોરણ 12 ઉચ્ચતર માધ્યમિક પ્રમાણપત્ર પરીક્ષામાં પોતાની પ્રથમ બેચે જ 95% પરિણામ મેળવીને નોંધપાત્ર સિદ્ધિ હાંસલ કરી છે. શાળાના સંચાલક હઝરત સૈયદ મોઇનુદ્દીન ઉર્ફે નૈયરબાબા રીફાઈએ આ ગૌરવપૂર્ણ સિદ્ધિ બદલ વિદ્યાર્થીઓ, વાલીઓ અને શિક્ષકોનો હૃદયપૂર્વક આભાર માન્યો હતો.આ પ્રસંગે તેમણે જણાવ્યું કે આ ક્ષણ સૌ માટે ભાવનાત્મક છે કારણ કે આ વિદ્યાર્થીઓ શાળાની પહેલી HSC બેચ જ નથી, પરંતુ 2012 માં જેમની સાથે આ શૈક્ષણિક સફર શરૂ કરી હતી તે પહેલી બેચ પણ છે. પ્રી-પ્રાયમરીથી લઈને હાઈસ્કૂલ સુધીની સફરમાં સાથ આપનાર તમામ શિક્ષકોના અતૂટ સમર્પણને તેમણે બિરદાવ્યું હતું. સંચાલકે વધુમાં કહ્યું કે શરૂઆતથી જ આ દ્રષ્ટિકોણમાં વિશ્વાસ રાખનારા તમામ દાતાઓ અને સમર્થકોની ઉદારતાએ બાળકોના જીવનને આકાર આપીને તેમને વધુ સારું ભવિષ્ય બનાવવાની તક આપી છે. વર્તમાન શિક્ષકો ઉપરાંત જે શિક્ષકો એક સમયે રીફાઇ પબ્લિક સ્કૂલનો ભાગ હતા અને યુવા મનને ઉછેરવામાં યોગદાન આપ્યું હતું તેમનો પણ તેમણે આભાર માન્યો હતો. આ સિદ્ધિ વિદ્યાર્થીઓ જેટલી જ તેમના દરેક શિક્ષકોની છે તેમ જણાવી તેમણે સૌને અભિનંદન પાઠવ્યા હતા.
