બ્રિજેશ પટેલ, ભરૂચ
નેત્રંગ: રાજવાડી ગામની શાસકીય ઉચ્ચતર માધ્યમિક વિદ્યાલયમાં અભ્યાસ કરતા ગ્રામીણ વિદ્યાર્થીઓ માટે ડિજિટલ દુનિયાના દ્વાર ખૂલ્યા છે. એસઆરએફ (SRF) ફાઉન્ડેશન દ્વારા સંચાલિત ‘એચપી વાવ (HP WoW) પ્રોજેક્ટ હેઠળ એક ખાસ હાઇ-ટેક બસને અત્યાધુનિક કોમ્પ્યુટર લેબમાં ફેરવીને શાળાના આંગણે લાવવામાં આવી છે. આ અનોખી પહેલ દ્વારા વિદ્યાર્થીઓને ૩૦ દિવસ સુધી સઘન તાલીમ આપવામાં આવશે.
બસ નહીં, પણ ‘વ્હીલ્સ પરનું સ્માર્ટ ક્લાસરૂમ’: આ ચાલતી-ફરતી લેબમાં લેપટોપ, હાઇ-સ્પીડ ઇન્ટરનેટ અને સ્માર્ટ બોર્ડ જેવી તમામ સુવિધાઓ ઉપલબ્ધ છે. ગ્રામીણ વિસ્તારમાં રહેતા બાળકો ટેકનોલોજીના યુગમાં પાછળ ન રહી જાય તે હેતુથી એસઆરએફ ફાઉન્ડેશનના ટ્રેનર રાહુલ વસાવા અને શાળાના શિક્ષકપુત્ર આકાશ વસાવા દ્વારા વિદ્યાર્થીઓને પ્રેક્ટિકલ તાલીમ આપવામાં આવી રહી છે. જેમાં એમએસ ઓફિસ, ઓનલાઈન સર્ચિંગ અને ડિજિટલ સાક્ષરતા જેવા મહત્વના વિષયો આવરી લેવામાં આવ્યા છે.
ભવિષ્યની રોજગારી માટે સજ્જ થશે વિદ્યાર્થીઓ: તાલીમ પૂર્ણ કરનાર ધોરણ ૯ થી ૧૨ ના આઈટી ટ્રેડના તમામ વિદ્યાર્થીઓને એસઆરએફ ફાઉન્ડેશન તરફથી માન્યતા પ્રાપ્ત પ્રમાણપત્ર આપવામાં આવશે. આ સર્ટિફિકેટ વિદ્યાર્થીઓને ભવિષ્યમાં ઉચ્ચ અભ્યાસ અને રોજગારી મેળવવામાં ખૂબ જ ઉપયોગી સાબિત થશે.
ડિજિટલ ઇન્ડિયાનું મજબૂત પગલું: શાળાના આચાર્ય શ્રી નવીનભાઈ ચૌધરી અને શિક્ષિકા જશોદાબેને આ પ્રોજેક્ટને બિરદાવતા જણાવ્યું હતું કે, “ગ્રામીણ ભારતના બાળકો જ્યારે લેપટોપ અને સ્માર્ટ ટેકનોલોજી સાથે કામ કરતા થાય છે, ત્યારે સાચા અર્થમાં ડિજિટલ ઇન્ડિયા સાકાર થાય છે. આ હાઇ-ટેક બસ જોઈને વિદ્યાર્થીઓમાં નવું શીખવા માટે જે ઉત્સાહ જોવા મળી રહ્યો છે તે અભૂતપૂર્વ છે.”
રાજવાડી જેવી ગ્રામીણ શાળામાં આવેલી આ હાઇ-ટેક લેબ હાલ સમગ્ર પંથકમાં ચર્ચા અને આકર્ષણનું કેન્દ્ર
બની છે.
