વિજાપુરમાં 43 સ્વસહાય જૂથોને રૂ. 86.50 લાખની કેશ ક્રેડિટ સહાય ફાળવાઈ
મહિલા સશક્તિકરણને મળશે વેગ; ડૉ. સી.જે. ચાવડાએ બહેનોને સ્વરોજગાર અને સરકારી યોજનાઓનો વધુમાં વધુ લાભ લેવા અપીલ કરી
વિજાપુર તા
વિજાપુર તાલુકા પંચાયત હોલ ખાતે તાલુકા કક્ષાના કેશ ક્રેડિટ કેમ્પનું આયોજન કરવામાં આવ્યું હતું. કેમ્પમાં 43 સ્વસહાય જૂથોને કુલ રૂ. 86 લાખ 50 હજારની કેશ ક્રેડિટ સહાયનું મંચ પરથી વિતરણ કરવામાં આવ્યું હતું. મહિલા સશક્તિકરણ અને સ્વરોજગારને પ્રોત્સાહન આપતા આ કાર્યક્રમમાં બહેનોમાં ઉત્સાહનો માહોલ જોવા મળ્યો હતો.
કાર્યક્રમમાં ધારાસભ્ય ડૉ. સી.જે. ચાવડા, તાલુકા પંચાયત પ્રમુખ, તાલુકા સંગઠન પ્રમુખ, શહેર સંગઠન પ્રમુખ, તાલુકા પંચાયત ઉપપ્રમુખ, કારોબારી ચેરમેન, જિલ્લા સંગઠન મંત્રી રાજેશભાઈ પટેલ,ભાજપના તાલુકા પ્રમુખ હાર્દીક પટેલ, તાલુકા વિકાસ અધિકારી ડી.એમ. ઝાલા, નાયબ તાલુકા વિકાસ અધિકારી, તાલુકા લાઈવલીહુડ મેનેજર કેતનભાઈ પ્રજાપતિ, તાલુકા એન.આર.એલ.એમ. સ્ટાફ તેમજ મોટી સંખ્યામાં સ્વસહાય જૂથોની બહેનો ઉપસ્થિત રહ્યા હતા.
પ્રસંગે ધારાસભ્ય ડૉ. સી.જે. ચાવડાએ બહેનોને સરકારની વિવિધ યોજનાઓનો લાભ લઈ તાલીમ અને સ્વરોજગાર દ્વારા આર્થિક રીતે આત્મનિર્ભર બનવા અપીલ કરી હતી. તેમણે કેશ ક્રેડિટ લોનનો હેતુપૂર્વક ઉપયોગ કરી પરિવારની આર્થિક સ્થિતિ મજબૂત બનાવવાનો સંદેશ આપ્યો હતો.
તાલુકા લાઈવલીહુડ મેનેજર કેતનભાઈ પ્રજાપતિએ રાષ્ટ્રીય ગ્રામિણ આજીવિકા મિશન (NRLM) યોજના અંગે વિસ્તૃત માહિતી આપી હતી અને સ્વસહાય જૂથોની બહેનોને મળતી વિવિધ સહાય અને લાભોની સમજણ આપી હતી.
કાર્યક્રમના અંતે લાભાર્થી બહેનોએ સરકાર દ્વારા મળેલી આર્થિક સહાય બદલ આનંદ વ્યક્ત કર્યો હતો અને લોનનો યોગ્ય ઉપયોગ કરી આત્મનિર્ભર બનવાનો સંકલ્પ વ્યક્ત કર્યો હતો.
