MORBI:મોરબીના આંદરણાના યુવાનોનો અનોખો પ્રસાદ: જન્માષ્ટમીએ માખણ-મિસરી સાથે ‘વિચારપ્રસાદ’ અને ‘પ્રશ્નપ્રસાદ’નું વિતરણ
MORBI:મોરબીના આંદરણાના યુવાનોનો અનોખો પ્રસાદ: જન્માષ્ટમીએ માખણ-મિસરી સાથે ‘વિચારપ્રસાદ’ અને ‘પ્રશ્નપ્રસાદ’નું વિતરણ
આંદરણા:જન્માષ્ટમીના પાવન પર્વે સામાન્ય રીતે દરેક જગ્યાએ માખણ, પંજીરી અને મિષ્ટાનનો પ્રસાદ વહેંચવામાં આવતો હોય છે. પરંતુ આંદરણા ગામના ઉત્સાહી અને જાગરૂક યુવાનોએ આ વર્ષે કૃષ્ણ જન્મોત્સવની ઉજવણીને એક તદ્દન અલગ અને અર્થપૂર્ણ ઊંચાઈ પર પહોંચાડી છે. શ્રીકૃષ્ણના ૫૨૫૩મા જન્મદિવસે યુવાનોએ પ્રસાદની સાથે ‘પ્રશ્નપ્રસાદ’ અને ‘વિચારપ્રસાદ’ વહેંચવાનો એક અનોખો અને આવકારદાયક પ્રયોગ કર્યો છે.
યુવાનો દ્વારા તૈયાર કરવામાં આવેલા ખાસ ૫૨૫ પ્રશ્નોના માધ્યમથી લોકો શ્રીકૃષ્ણના જીવન, તેમના ઉપદેશો અને ભગવદ્ ગીતાના રહસ્યો તરફ ઊંડાણપૂર્વક વિચારતા થાય તેવો નમ્ર પ્રયાસ કરવામાં આવ્યો છે. માત્ર બાહ્ય પૂજા-અર્ચના કે ઉત્સવ ઉજવવાને બદલે કાન્હાના વિચારોને જીવનમાં ઉતારવા અને ‘ક્રિષ્ન તરફ એક ડગલું’ ભરવાની આ પહેલને ગ્રામજનો અને વૈષ્ણવોએ લાખેણા વધામણાં આપી બિરદાવી છે.
ગામના યુવાનોની આ અનોખી પહેલના મુખ્ય આકર્ષણો:જ્ઞાન સાથે ભક્તિ: માત્ર ભોગ ધરાવવાને બદલે ગીતા અને કૃષ્ણ ચરિત્ર પર આધારિત ૫૨૫ પ્રશ્નો થકી જ્ઞાનની જ્યોત પ્રગટાવી.
વિચારપ્રસાદ: ધર્મનો સાચો અર્થ સમજીને જીવનમાં સદગુણો કેળવવાનો પ્રેરણાદાયી સંદેશ.નવી પેઢી માટે પ્રેરણા: યુવાધન દ્વારા સંસ્કૃતિ અને આધ્યાત્મિકતાને આધુનિક અને રોચક શૈલીમાં રજૂ કરવાનો સરાહનીય પ્રયાસ.
ગામલોકોનું માનવું છે કે પોતાના બાળરૂપ કાન્હાને પણ આંદરણાના યુવાનોનો આ નવતર અભિગમ ખૂબ ગમ્યો હશે, કારણ કે કૃષ્ણ પોતે જ્ઞાન અને કર્મનો માર્ગ દર્શાવનારા જગતગુરુ છે. આંદરણાના યુવાનોની આ પવિત્ર અને વિચારપ્રેરક પહેલ અન્ય ગામો અને શહેરો માટે પણ એક ઉત્કૃષ્ટ ઉદાહરણ સાબિત થઈ છે.
